जुन्नरच्या आदिवासी भागातील ऋतुजा राज्यशास्त्रात राज्यात प्रथम

जुन्नरच्या आदिवासी भागातील ऋतुजा राज्यशास्त्रात राज्यात प्रथम

सजग टीम, जुन्नर

 

 जुन्नर | शासकीय माध्यमिक व उच्च माध्यमिक कन्या आश्रम शाळा सोमतवाडी या शाळेची उज्वल यशाची व निकालाची परंपरा गेल्या दहा वर्षापासून अबाधित आहे याआधी सलग तीन वर्ष इयत्ता बारावी चा निकाल शंभर टक्के लागलेला असून यावर्षीचा निकाल 97:72 टक्के लागला आहे.

या शाळेत जुन्नर तालुक्यातील आदिवासी भागातील ऋतुजा संपत लांडे या विद्यार्थीनीने १२ वीच्या परीक्षेत भरघोस यश मिळवत जुन्नरचे नाव राज्यात चमकवले आहे.

या यशाबद्दल आदिवासी विकास विभागाच्या प्रधान सचिव मनीषा वर्मा व प्रकल्प अधिकारी पंढुरे साहेब यांनी वैयक्तिकरित्या ऋतुजा व शिक्षकांशी दूरध्वनीवरून संपर्क साधून त्यांचे अभिनंदन केले आहे.

याबाबत सविस्तर माहिती अशी आहे की, नुकताच इयत्ता १२ वी बोर्डाच्या परिक्षेच्या निकालात ऋतुजा लांडे हिने राज्यशास्त्र या विषयामध्ये राज्यात दुसरा तर आदिवासी विकास विभाग मध्ये प्रथम क्रमांक मिळवत घवघवीत यश संपादन केले आहे. हालाखीच्या परिस्थितीत मिळवलेल्या या यशाबद्दल सर्वच स्तरांमधून तिचे कौतुक होत आहे.

जुन्नर शहरापासून ४० किलोमीटर अंतरावर असणारे आदिवासी वस्तीचे घाटघर हे ऋतुजाचे गाव. आई संजाबाई व वडील संपत लांडे हे शेती करतात जेमतेम असणारी शेती हेच उत्पन्नाचे साधन आई वडिलांचे शिक्षण फारसे झाले नाही. पण आपल्या मुलीने शिकून मोठं व्हावं ही त्यांची इच्छा. अशा परिस्थितीमध्ये देखील त्यांनी मुलीला शिक्षणासाठी प्रोत्साहन दिले. त्याचे तिने सोनं केल्याची भावना कुटुंबीयांनी व्यक्त केली आहे.

ऋतुजाने प्राथमिक शिक्षण घाटघर येथील जिल्हा परिषद शाळेत घेतल्यानंतर पुढील शिक्षणसाठी आदिवासी आश्रम शाळा जुन्नर येथे प्रवेश घेतला. याठिकाणी ऋतुजाला आदिवासी आश्रम शाळेच्या मुख्याध्यापिका एस. एस. कांबळे, वर्ग शिक्षक एस. एस. भारती यांचे मार्गदर्शन व सहकार्य लाभले. तर राज्यशास्त्र विषयाचे शिक्षक गणेश गोडसे यांचा देखील तिच्या यशामध्ये सिंहाचा वाटा असल्याचे ऋतुजाने “सजग टाईम्स न्यूज”शी बोलताना सांगितले.

ऋतुजाला कायद्याची आवड असून तिला विधितज्ञ होऊन महिलांमध्ये कायद्याविषयी असणारे अज्ञान याबद्दल जनजागृती करायची असल्याचेही तिने सांगितले.

ऋतुजाच्या यशामध्ये जुन्नर आंबेगावचे प्रांताधिकारी व आदिवासी विभागाचे प्रकल्प अधिकारी जितेंद्र डुडी, सहायक शिक्षण प्रकल्प अधिकारी नवनाथ भवारी, अधीक्षिका ए.के.राजपूत, बी.डी.आमटे, व्ही.डी.साबळे, पूर्व अधिक्षिका ए.टी.पवार आदींचे मोलाचे सहकार्य लाभले.

Read more...
Open chat