काय आहे पुणे शहरातील लॉकडाऊनचे नियोजन?

काय आहे पुणे शहरातील लॉकडाऊनचे नियोजन?

सजग वेब टीम , पुणे

पुणे | पुणे शहरात लागू करण्यात आलेला नवा लॉकडाऊन एकूण दहा दिवसांचा असणार आहे. १३ जुलैच्या मध्यरात्रीपासून तर २३ जुलैच्या मध्यरात्रीपर्यंत हा टप्पा असेल. यात प्रामुख्याने दोन टप्पे करण्यात आले आहेत.

१) १४ जुलै ते १८ जुलैपर्यंत केवळ औषधे, वैद्यकीय सेवा आणि दूध उपलब्ध असणार
२) १९ जुलैपासून अत्यावश्यक सेवा (वैद्यकीयसह इतर) स. १० ते दु. ४ सुरु राहतील
३) दहा दिवसांच्या कालावधीत अत्यावश्यक सेवेसाठी ऑनलाईन पास देण्याची व्यवस्था असेल.

४) शेवटच्या टप्प्यात आढावा घेऊन पुढचा निर्णय घेण्यात येणार

या संदर्भात लेखी आदेश आज निर्गमित केले जाणार आहेत !

Read more...

कोरोनाचा वाढता संसर्ग विचारात घेता व्यापक सर्वेक्षण व तपासण्या वाढवा – उपमुख्यमंत्री अजित पवार

कोरोनाची साखळी तोडण्यासाठी प्रसंगी पुन्हा लॉकडाऊन घोषित करण्याचा उपमुख्यमंत्री अजित पवार यांचा इशारा

कोरोनाचा वाढता संसर्ग विचारात घेता व्यापक सर्वेक्षण व तपासण्या वाढवा – उपमुख्यमंत्री अजित पवार

सजग वेब टीम,  पुणे

पुणे(दि.१०) | पुणे तसेच पिंपरी चिंचवड शहरासोबतच ग्रामीण भागात कोरोनाबाधित रुग्णांची संख्या दिवसेंदिवस वाढत आहे. अनेक नागरीक कोणत्याही कारणाशिवाय घराबाहेर मास्क न वापरता तसेच प्रशासनाने घालून दिलेल्या नियमांचे पालन न करता गर्दी करत असल्याचे निदर्शनास येत आहे. अशीच परिस्थिती कायम राहिल्यास आणखी कडक भूमिका घ्यावी लागेल. प्रसंगी पुन्हा लॉकडाऊन घोषित करावा लागेल, असा इशारा उपमुख्यमंत्री तथा पुणे जिल्ह्याचे पालकमंत्री अजित पवार यांनी आज दिला. कोरोनाचा वाढता संसर्ग विचारात घेता व्यापक सर्वेक्षण कोरोना चाचण्या वाढविण्यासोबतच कोरोनाची साखळी तोडणे हे आपल्यापुढील प्रमुख आव्हान आहे. सर्वांनी सजग राहून कामे करावीत, असे निर्देशही श्री पवार यांनी दिले.

विभागीय आयुक्त कार्यालयात कोरोना विषाणू प्रादुर्भाव निर्मुलन आढावा बैठक घेण्यात आली. यावेळी ते बोलत होते. बैठकीला मुख्यमंत्री यांचे प्रधान सल्लागार अजोय मेहता, सार्वजनिक आरोग्य विभागाचे प्रधान सचिव डॉ. प्रदीपकुमार व्यास, विभागीय आयुक्त डॉ. दीपक म्हैसेकर, जमाबंदी आयुक्त एस. चोक्कलिंगम, जिल्हाधिकारी नवल किशोर राम, पुणे मनपा आयुक्त शेखर गायकवाड, पिंपरी चिंचवड मनपा आयुक्त श्रावण हर्डीकर, पोलीस आयुक्त डॉ. के. व्यंकटेशम, संदीप बिष्णोई, साखर आयुक्त सौरभ राव, पुणे महानगर प्रदेश विकास प्राधिकरणचे मुख्य कार्यकारी अधिकारी विक्रम कुमार, सहकार आयुक्त अनिल कवडे, भूजल सर्वेक्षण व विकास यंत्रणेचे संचालक कौस्तुभ दिवेगावकर, अतिरिक्त आयुक्त रुबल अग्रवाल, शांतनु गोयल, पोलीस अधीक्षक संदीप पाटील, जिल्हा परिषदेचे मुख्य कार्यकारी अधिकारी आयुष प्रसाद, शासनाचे वैद्यकीय सल्लागार डॉ. सुभाष साळुंके, ससूनचे अधिष्ठाता डॉ. मुरलीधर तांबे यांच्यासह संबंधित विभागाचे वरिष्ठ अधिकारी उपस्थित होते.

उपमुख्यमंत्री अजित पवार म्हणाले, कोरोनाची आपत्ती लक्षात घेता महानगरपालिका व इतर यंत्रणांमार्फत विविध प्रतिबंधात्मक उपाययोजना करण्यात येत आहेत. तथापि, परिसरनिहाय सूक्ष्म नियोजन केल्यास अधिक प्रभावीपणे काम करणे शक्य होईल. टाळेबंदीच्‍या शिथिलीकरणानंतर यंत्रणांची जबाबदारी वाढली आहे. त्यामुळे योग्य अंतर राखणे, मास्क वापरणे आदींचा अवलंब होत नसल्यास कारवाई करून शिस्त निर्माण करण्यासाठी प्रयत्न करावा. कोणत्याही परिस्थितीत कंटेनमेंट झोन्समध्ये कडक बंधने पाळली जातील, याकडे लक्ष द्यावे. कोरोनाची साखळी तोडणे हे आपल्यापुढील प्रमुख आव्हान आहे. जिथे उद्योग- व्यवसायांना परवानगी देण्यात आली तिथे लक्ष केंद्रीत करून अधिक काळजी घ्यावी, अशा सूचनाही श्री पवार यांनी दिल्या.

ग्रामीण भागात कोरोनाचा संसर्ग रोखण्यासाठी वेळीच खबरदारी घेणे आवश्यक असल्याचे सांगून उपमुख्यमंत्री पवार म्हणाले, पुणे शहर तसेच लगतच्या गावात कोरोनाचा संसर्ग वाढत असल्याचे निदर्शनास येत आहे. संसर्ग रोखण्यासाठी वेळीच कडक उपाययोजना कराव्यात तसेच ‘फिव्हर क्लिनिक’मध्ये आवश्यक मनुष्यबळ व सामग्री उपलब्ध करून द्यावी. जेणेकरून ग्रामीण भागातील नागरिकांना लवकरात लवकर उपचार मिळणे शक्य होईल. कोविड केअर सेंटर, डेडीकेटेड कोविड हॉस्पिटलमध्ये राज्य शासनाच्या मार्गदर्शक सूचनेनुसार सर्व आरोग्यविषयक सुविधा सज्ज ठेवाव्यात, अशा सूचनाही त्यांनी दिल्या.

मुख्यमंत्री यांचे प्रधान सल्लागार अजोय मेहता म्हणाले, कोरोनाबाधित रुग्णाच्या संपर्कात आलेल्या व्यक्तीचा शोध, घरोघरी सर्व्हेक्षण तसेच कोरोना चाचण्या वाढविणे आवश्यक आहे. कोरोना चाचणीसाठी स्‍राव नमुना घेतल्यानंतर अहवाल येण्यासाठी विलंब होणार नाही, याची दक्षता घ्या तसेच घरोघरी जावून करण्यात येत असलेले सर्वेक्षण वाढविण्यासोबतच यामध्ये स्थानिक सामाजिक कार्यकर्ते तसेच सोसायटीचे अध्यक्ष यांचाही सहभाग घ्यावा, अशा सूचना करून झोपडपट्टी क्षेत्रातील स्वच्छतागृहांच्या स्वच्छतेबाबत दक्षता घेण्याच्या सूचनाही श्री मेहता यांनी दिल्या.

आरोग्य विभागाचे प्रधान सचिव डॉ. प्रदीप व्यास यांनी पुणे जिल्ह्याची कोरोना बाबतची सद्यस्थितीची सादरीकरणाद्वारे माहिती दिली. कोरोना वाढीचा दर, बरे होण्याचा दर, मृत्यू दर याचा अंदाज घेत जुलैअखेर अपेक्षित असलेल्या नियोजनाबाबत माहिती दिली. प्रतिबंधित क्षेत्राबाहेरही मोठया प्रमाणात कोरोनाचे रुग्ण असल्याने त्यादृष्टीने व्यापक नियोजन करण्यात आल्याचे त्यांनी सांगितले.

विभागीय आयुक्त डॉ. दीपक म्हैसेकर यांनी कोरोना प्रतिबंधासाठीचे करण्यात येत असलेल्या उपाययोजनांबाबत माहिती दिली. कोरोना प्रतिबंधासाठी प्रत्येक विभागाकडून सुरू असलेल्या उपाययोजनांबाबत सातत्याने आढावा घेतला जात असल्याचे त्यांनी सांगितले.

जिल्हाधिकारी नवल किशोर राम यांनी ग्रामीण भागात कोरोनाचा संसर्ग रोखण्यासाठी करण्यात येत असलेल्या उपाययोजनाबाबत सविस्तर माहिती दिली. ज्या गावात कोरोना रुग्ण आढळत आहे, त्या संपूर्ण गावाला प्रतिबंधित क्षेत्र घोषित करून उपाययोजना राबविण्यात येत असल्याचे सांगून शहरानजीकच्या गावातील वाढता संसर्ग विचारात घेत उपाययोजनांवर भर दिला जात असल्याचे त्यांनी सांगितले.

पुणे मनपा आयुक्त शेखर गायकवाड व पिंपरी चिंचवड आयुक्त श्रावण हर्डीकर यांनी महापालिकाक्षेत्रात कोरोना प्रतिबंधासाठी करण्यात येत असलेल्या उपाययोजनाबाबत माहिती दिली. यावेळी विविध यंत्रणांचे अधिकारी उपस्थित होते.

Read more...

पुणे – नाशिक हायस्पीड रेल्वे प्रकल्पाला रेल्वे मंत्रालयाची मंजुरी खा. अमोल कोल्हे यांची माहिती

पुणे – नाशिक हायस्पीड रेल्वे प्रकल्पाला रेल्वे मंत्रालयाची मंजुरी खा. अमोल कोल्हे यांची माहिती

सजग वेब टिम, पुणे

पुणे | पुणे – नाशिक हायस्पीड रेल्वे प्रकल्पाला महाराष्ट्र सरकारची मंजुरी मिळावी यासाठी आज खासदार डॉ. अमोल कोल्हे यांच्या पुढाकारातून राज्याचे उपमुख्यमंत्री व वित्त आणि नियोजन खात्याचे मंत्री अजितदादा पवार यांच्या उपस्थितीत मंत्रालयात या प्रकल्पाचे सादरीकरण करण्यात आले. यावेळी उपमुख्यमंत्री पवार यांनी अनुकूल प्रतिसाद दिल्यामुळे या प्रकल्पाला गती देण्यात डॉ. कोल्हे यांना यश आले आहे.

गेल्या वर्षभरापासून रेल्वे मंत्रालयाकडे पुणे – नाशिक हायस्पीड रेल्वे प्रकल्पाचा सविस्तर प्रकल्प अहवाल (DPR) मंजुरीच्या प्रतीक्षेत होता. त्यामुळे डीपीआरला मंजुरी मिळावी यासाठी गेल्या काही महिन्यांपासून डॉ. कोल्हे प्रत्येक टप्प्यावर पाठपुरावा करीत होते. संसदेच्या अर्थसंकल्पीय अधिवेशनाच्या काळात त्यासाठी विशेष प्रयत्न त्यांनी केला होता. या प्रयत्नांना अखेरीस यश मिळाले आणि २ जून रोजी या प्रकल्पाला रेल्वे मंत्रालयाने (रेल्वे बोर्ड) मंजुरी दिली.

रेल्वे मंत्रालयाची मंजुरी मिळताच खासदार डॉ. कोल्हे यांनी तत्काळ उपमुख्यमंत्री अजितदादा पवार यांच्याशी संपर्क साधून पुणे – नाशिक हायस्पीड रेल्वे प्रकल्पाच्या सादरीकरणासाठी वेळ मागितली होती. मात्र बुधवारी निसर्ग चक्रीवादळ धडकणार असल्याने उपमुख्यमंत्र्यांनी गुरुवारी (दि. ४ रोजी) वेळ दिली. त्याबरोबर डॉ. कोल्हे यांनी महारेलचे व्यवस्थापकीय संचालक राजेश जैस्वाल यांना सादरीकरणाच्या तयारीनिशी मंत्रालयात येण्याच्या सूचना दिल्या. त्यानुसार दुपारी साडेतीन वाजता श्री. जैस्वाल यांनी प्रकल्पाचे सादरीकरण केले. यावेळी उपमुख्यमंत्री अजितदादा पवार, वित्त विभागाचे अतिरिक्त मुख्य सचिव राजगोपाल देवरा, परिवहन विभागाचे अतिरिक्त मुख्य सचिव आशिष सिंह, नियोजन विभागाचे अतिरिक्त मुख्य सचिव देवाशिष चक्रवर्ती, उपमुख्यमंत्र्यांचे सचिव राजीव जाधव, खासदार डॉ. कोल्हे आदी उपस्थित होते.

सुमारे तासभर चाललेल्या या सादरीकरणा दरम्यान वित्त, नियोजन आणि परिवहन या तीनही विभागाच्या अतिरिक्त मुख्य सचिवांनी प्रकल्पासाठी येणारा खर्च व अन्य तांत्रिक बाबींवर चर्चा केली. त्यांच्या शंकांचे श्री. जैस्वाल यांनी निराकरण केले. यावेळी उपमुख्यमंत्री पवार यांनी पुणे-नाशिक हायस्पीड रेल्वे प्रकल्प महत्त्वाचा असून या प्रकल्पाच्या सर्व बाजू समजावून घेऊन आवश्यक सूचना केल्या. तसेच आपण या प्रकल्पाबाबत सकारात्मक असल्याचे संकेत दिले.

या बैठकीमुळे गेल्या २५ वर्षांपासून जुन्नर, आंबेगाव, खेडसह शिरूर लोकसभा मतदारसंघातील जनतेने पाहिलेले स्वप्नं आता प्रत्यक्षात उतरण्याचा मार्ग मोकळा झाला आहे. गेली १५ वर्ष शिरूर लोकसभा मतदारसंघातील जनता फक्त रेल्वे प्रकल्प होणार हे ऐकत होती. पण ती प्रत्यक्षात रुळावर केव्हा धावणार हा विषय लोकसभा निवडणुकीत कळीचा मुद्दा ठरला होता. त्यावेळी डॉ. कोल्हे यांनी आपण निवडून आल्यावर पुणे – नाशिक हायस्पीड रेल्वे प्रकल्प पूर्ण करण्याचे आश्वासन दिले होते. वर्षभरापासून डॉ. कोल्हे गेली अनेक वर्ष रखडलेल्या या प्रकल्पाचा पाठपुरावा करीत होते. त्यांच्या अथक प्रयत्नांना यश मिळाल्याने त्यांनी मतदारांना दिलेल्या आश्वासनांची पूर्तता होण्याच्या दृष्टीने महत्त्वपूर्ण पाऊल पडले आहे.

या संदर्भात बोलताना खासदार डॉ. कोल्हे यांनी सांगितले की, आजचे प्रकल्पाचे सादरीकरण अतिशय प्रभावी झाले असून उपमुख्यमंत्री अजितदादा पवार यांच्यासह परिवहन, वित्त व नियोजन या तीनही विभागाच्या अतिरिक्त मुख्य सचिवांनी अनुकूल प्रतिसाद दिला असून राज्य सरकारकडून या प्रकल्पाला मंजुरी मिळावी यासाठी मी प्रत्येक स्तरावर पाठपुरावा करणार असून मतदारसंघातील जनतेचं हे स्वप्न नक्की पूर्ण करु असे डॉ. कोल्हे यांनी सांगितले.

Read more...

मुंबई- पुणे भागात लॉकडाऊन बाबतीत सवलती रद्द – मुख्यमंत्री उद्धव ठाकरे

मुंबई- पुणे भागात लॉकडाऊन बाबतीत सवलती रद्द – मुख्यमंत्री उद्धव ठाकरे

नागरिकांनी मुक्तपणे व्यवहार सुरु केल्याने शासनाचा निर्णय

सजग वेब टिम, जुन्नर

मुंबई दि २१ |  कोरोना विषाणूंचा वाढता फैलाव रोखण्यासाठी मुख्यमंत्री उद्धव ठाकरे यांनी राज्यासाठी लॉकडाऊन मध्ये आणलेली शिथिलता मुंबई- पुणे भागासाठी रद्द केली असून अधिक काटेकोरपणे लॉकडाऊन पाळले जावे असे प्रशासनाला निर्देश दिले आहेत. २० एप्रिलपासून लॉकडाऊनच्या बाबतीत काही प्रमाणात शिथिलता आणण्याचे राज्य सरकारने ठरविल्यानंतर नागरिकांनी मुक्तपणे व्यवहार सुरु केले होते. यावर मुख्यमंत्र्यांनी नागरिकांना उद्देशून केलेल्या लाईव्ह प्रसारणातही नाराजी व्यक्त केली होती तसेच निर्बंध न पाळल्यास शिथिलता रद्द केली जाईल असा इशाराही दिला होता.

लॉकडाऊन संदर्भात राज्य शासनाने १७ एप्रिल रोजी काढलेल्या सर्वसमावेशक अधिसूचनेतील नव्याने शिथिल केलेल्या बाबी रद्द करणारी दुरुस्ती आज करण्यात आली असून मुंबई आणि पुण्यासाठी ती लागू असेल.म्हणजेच १७ एप्रिलला सुधारित अधिसूचनेपूर्वीची परिस्थिती मुंबई आणि पुण्यासाठी लागू राहील. उर्वरित राज्यात १७ एप्रिलप्रमाणे शिथिलता राहील.

ई कॉमर्स कंपन्यांना इलेक्ट्रिकल व इलेक्ट्रॉनिक्स वस्तूंची वाहतूक करण्यास दिलेली शिथिलताही रद्द करण्यात आली आहे . त्यांना केवळ अन्न, जीवनावश्यक वस्तू, औषधी, आणि वैद्यकीय उपकरणे यांचीच वाहतूक करता येईल.

फरसाण, मिठाईची दुकाने, कन्फेक्शनरी दुकाने हेही मुंबई-पुण्यात पूर्वीच्या आदेशाप्रमाणे बंदच राहतील

बांधकामे देखील मुंबई आणि पुण्यात बंदच राहतील तसेच या भागांतील माहिती तंत्रज्ञान कंपन्यांनी देखील त्यांच्या कर्मचाऱ्यांकडून वर्क फ्रॉम होम पद्धतीनेच काम करून घ्यायचे आहे

राज्यभरात वृत्तपत्रांचे वितरण करणारे विक्रेते हे मास्क, जंतू नाशक हाताला लावून तसेच सामाजिक अंतर ठेऊन वृत्तपत्रे घरोघर देऊ शकतील मात्र मुंबई आणि पुणे पालिका क्षेत्रात तसेच कंटेनमेंट क्षेत्रात वितरण करण्यावर प्रतिबंध राहील असेही स्पष्ट करण्यात आले आहे.

Read more...

कोरोनाच्‍या दोन व्‍यक्‍तींना डिस्‍चार्ज – विभागीय आयुक्‍त डॉ. म्‍हैसेकर

कोरोनाच्‍या दोन व्‍यक्‍तींना डिस्‍चार्ज- विभागीय आयुक्‍त डॉ. म्‍हैसेकर

सजग वेब टिम, जुन्नर

पुणे, दि. २५ | जिल्‍ह्यात कोरोनाच्‍या पहिल्‍या ज्‍या दोन व्‍यक्‍ती अॅडमिट झाल्‍या होत्‍या, त्‍यांच्‍या दोन्‍ही टेस्‍ट निगेटीव्‍ह आल्‍या आहेत, त्‍यामुळे आज त्‍यांना डीस्‍चार्ज दिला आहे. दुस-या दिवशी जे तीन पेशंट अॅडमिट झाले होते, त्‍यांच्‍या पहिल्‍या टेस्‍ट निगेटीव्‍ह आल्‍या आहेत, आज त्‍यांच्‍या दुस-या टेस्‍ट घेत आहोत, त्‍या निगेटीव्‍ह आल्‍या तर त्‍यांना उद्या डिस्‍चार्ज दिला जाईल, अशी माहिती विभागीय आयुक्‍त डॉ. दीपक म्‍हैसेकर यांनी दिली. गुढीपाडव्‍याच्‍या शुभेच्‍छा देतांनाच सर्वांच्‍या मदतीने कोरोनावर मात करु, असा विश्‍वासही त्‍यांनी व्‍यक्‍त केला.

पुणे विभागातील कोरोनाच्‍या सद्यस्‍थ‍ितीची माहिती देतांना विभागीय आयुक्‍त डॉ. म्‍हैसेकर म्‍हणाले, पुणे विभागात एकूण ८२५ नमुने घेतले होते, त्‍यापैकी ७३७ चे अहवाल प्राप्‍त झाले. यामध्‍ये ६९२ अहवाल निगेटीव्‍ह आले आहेत तर ३७ अहवाल पॉझिटीव्‍ह आले आहेत. याचा अर्थ जवळ-जवळ ९० टक्‍के अहवाल निगेटीव्‍ह आलेत, ही समाधानाची बाब आहे. प्रधानमंत्री श्री. मोदी यांनी २१ दिवसांचा लॉक डाऊन घोषित केला आहे. त्‍याचे नागरिकांनी कुठेही उल्‍लंघन करु नये, असे आवाहन करुन ते म्‍हणाले, या २१ दिवसांत आपल्‍या सर्वांची साथ, सर्वांचे सहकार्य या परिस्थितीवर मात करण्‍यासाठी मदत करु शकते. कोणत्‍याही जीवनावश्‍यक वस्‍तू म्‍हणजे औषधी, भाजीपाला, अन्‍नधान्‍य आपल्‍यापर्यंत पोहोचवण्‍याचा आमचा आटोकाट प्रयत्‍न राहील, प्रशासन यासाठी नियोजन करत आहे. आपण या नियोजनाला सहकार्य करावे, असे आवाहनही त्‍यांनी केले.

आरोग्‍य यंत्रणेने पहिले दोन पेशंट बरे व्‍हावे, यासाठी रात्रंदिवस अथक प्रयत्‍न केले. पुणे, पिंपरी चिंचवड तसेच विभागाच्‍या इतर जिल्‍ह्यातील अधिकारी हे कोरोनाच्‍या प्रतिबंधासाठी काम करीत आहे, या सर्वांचे त्‍यांनी कौतुक केले. तसेच काही कर्मचारी आदेशाचे उल्‍लंघन करुन निघून जात असतील तर त्‍यांच्‍यावर प्रशासन कठोर कारवाई करेल, असा इशाराही डॉ. म्‍हैसेकर यांनी दिला. या संकट समयी कुठेही डगमगून जावू नका, आपण सर्व एकत्र मिळून कोरोनावर मात करु या, असे आवाहन करुन स्‍वत:ला सुरक्षित ठेवा, त्‍याच बरोबर सगळयांना सुरक्षित ठेवा, असेही ते म्‍हणाले.

Read more...

पुणे – मुंबई दरम्यानच्या एक्स्प्रेस रेल्वेगाड्यांच्या वेळापत्रकात बदल करा – खा. अमोल कोल्हे

पुणे – मुंबई दरम्यानच्या एक्स्प्रेस रेल्वेगाड्यांच्या वेळापत्रकात बदल करा – खा. अमोल कोल्हे

सजग वेब टिम, पुणे

पुणे| राज्य सरकारी कर्मचाऱ्यांना मुंबईतील शासकीय कार्यालयात वेळेत पोहोचता यावे यासाठी पुणे रेल्वे स्टेशनवरून सुटणाऱ्या सिंहगड एक्सप्रेस, डेक्कन क्वीन आणि प्रगती एक्स्प्रेस या गाड्यांच्या वेळापत्रकात बदल करण्याची मागणी खासदार डॉ. अमोल कोल्हे यांनी आज केंद्रीय रेल्वेमंत्री श्री. पियुष गोयल यांच्याकडे केली.

महाराष्ट्र शासनाने नुकताच कार्यालयीन कामकाजासाठी ५ दिवसांचा आठवडा जाहीर केला. त्यानुसार कर्मचारी व अधिकाऱ्यांच्या दैनंदिन कामकाजाच्या वेळेमध्ये सकाळी ९.४५ ते सायंकाळी ६.१५ वा. असा बदल करण्यात आला. या बदलामुळे पुण्याहून मुंबईला दैनंदिन प्रवास करणाऱ्या शासकीय कर्मचारी व अधिकाऱ्यांना सिंहगड एक्सप्रेस, डेक्कन क्वीन आणि प्रगती एक्स्प्रेस या रेल्वेगाड्यांचे दैनंदिन वेळापत्रक गैरसोयीचे ठरले. परिणामी शासकीय कर्मचारी व अधिकारी आपल्या कार्यालयात वेळेत पोहोचू शकत नसल्याने त्यांना ‘लेटमार्क’ला सामोरे जावे लागत आहे. त्यामुळे रेल्वे प्रशासनाने पुण्याहून सुटणाऱ्या सिंहगड एक्सप्रेस, डेक्कन क्वीन आणि प्रगती एक्स्प्रेस या गाड्यांचे वेळापत्रक बदलावे अशी मागणी करणारे निवेदन पुणे व पिंपरी चिंचवड रेल्वे प्रवासी संघटनेने खासदार डॉ. अमोल कोल्हे यांना दिले होते.

खासदार डॉ. कोल्हे यांनी याची तत्काळ दखल घेऊन संसद अधिवेशनाच्या दुसऱ्याच दिवशी रेल्वे मंत्री श्री. पियुष गोयल यांची भेट घेऊन रेल्वे वेळापत्रक बदलण्याची मागणी करणारे पत्र दिले. यावेळी रेल्वे मंत्री श्री. गोयल यांनी मुंबई उपनगरीय गाड्यांचे वेळापत्रक पाहून या मागणीबाबत सकारात्मक निर्णय घेण्याचे आश्वासन दिले.

Read more...

शिरूर मतदारसंघात राष्ट्रवादीमध्ये कोणतेही वाद नाही: अजित पवार

पुणे : “शिरूर मतदारसंघात राष्ट्रवादीमध्ये कोणतेही वाद नाही. विलास लांडे, मंगलदास बांदल यांच्यासह प्रमुख कार्यकर्त्यांशी मी आज सकाळी चर्चा केली. सर्वांची समजूत काढली आहे. काही कार्यकर्त्यांनी सकाळी फलक लावल्याचे समजल्यानंतर चर्चा झाली. आता सर्व कार्यकर्ते एकदिलाने प्रचाराला लागले आहेत. याची प्रचिती शिरूरसाठी होणाऱ्या प्रचारात दिसून येईल” असे माजी उपमुख्यमंत्री अजित पवार यांनी सांगितले.

राष्ट्रवादीकडून शिरुर मतदार संघात डॉ. अमोल कोल्हे यांना उमेदवारी जाहीर केल्यामुळे नाराज झालेल्या विलास लांडेंच्या कार्यकर्त्यांनी बॅनरबाजी करुन आपला निषेध व्यक्त केला आहे. गेल्या निवडणुकीत विलास लांडे राष्ट्रवादीचे उमेदवार म्हणून शिरुर मतदारसंघात उभे होते. यावेळीही त्यांनाच उमेदवारी मिळेल अशी आशा त्यांना आणि त्यांच्या कार्यकर्त्यांना होती. अमोल कोल्हे यांच्या राष्ट्रवादीमध्ये प्रवेश केल्यानंतर त्यांना याबाबत साशंकता निर्माण झाली होती. राष्ट्रवादीकडून शिरुर मतदारसंघात अमोल कोल्हे यांना उमेदवारी जाहीर केल्यामुळे विलास लांडे यांचे कार्यकर्ते नाराज झाले. त्यामुळे शिरुर मतदार संघात कोल्हेंविरोधात बॅनरबाजी करुन नाराजी व्यक्त केली. अमोल कोल्हेंना शिरुर मतदारसंघात पाडणार अशी भूमिका लांडे यांच्या कार्यकर्त्यांनी घेतली असून त्यांना समजावण्याचा प्रयत्न लांडे यांनी केला.

या प्रकारावरुन राष्ट्रवादीमध्ये अंतर्गत गटबाजी सुरु असल्याची चर्चा सुरु होती. याचा फायदा विरोधी पक्षांना नक्कीच होऊ शकतो. याबाबत अजित पवार यांनी विलास लांडे, मंगलदास बांदल यांच्यासह प्रमुख कार्यकर्त्यांशी चर्चा करुन सर्वांची समजूत घातली असल्याचे स्पष्ट केले. दरम्यान, विलास लांडे यांनी राष्ट्रवादी कॉंग्रेसचे अध्यक्ष शरद पवार यांची आज मुंबईत भेट घेतली. शरद पवार यांनी, कामाला लागा असा आदेश दिला असून लांडे यांनी देखील ”पक्ष जे काम देईल ते मी करणार” अशी भुमिका स्पष्ट केली.

Read more...

पुणे महानगरपालिकेच्या स्थायी समिती अध्यक्षपदी सुनील कांबळे

सजग वेब टीम, जुन्नर

पुणे – भाजपचे ज्येष्ठ नगरसेवक सुनील ज्ञानदेव कांबळे यांची स्थायी समितीच्या अध्यक्षपदी मंगळवारी बिनविरोध निवड झाली. राष्ट्रवादी कॉंग्रेसच्या स्मिता कोंढरे यांनी निवडणुकीतून माघार घेतल्याने, कांबळे यांनी निवड बिनविरोध झाल्याची घोषणा निवडणूक निर्णय अधिकारी सुशील खोडवेकर (प्रकल्प संचालक, कृषी विकास विभाग) यांनी केली.

स्थायी समितीत सर्वाधिक 10 सदस्य असल्याने कांबळे यांची निवड निश्‍चित होती. मात्र, कोंढरे यांनी माघार घेतल्याने ही निवड केवळ औपचारिकता ठरली. कांबळे हे सलग चौथ्यांदा बिबवेवाडी-मार्केटयार्ड परिसरातून विजयी झाले आहेत. या कालावधीत त्यांनी स्थायी समिती, महिला बाल कल्याण समिती सदस्य, शहर सुधारणा समिती अध्यक्षपद भूषविले आहे. तसेच ते शहर भाजपचे वरिष्ठ उपाध्यक्ष म्हणून काम पाहत आहेत. तसेच भाजप झोपडपट्टी आघाडी चे दोन वेळा शहर अध्यक्षपद भूषविले आहे.

दरम्यान, मंगळवारी झालेल्या निवडणुकीवेळी पालकमंत्री गिरीश बापट, राज्यमंत्री दिलीप कांबळे, महापौर मुक्ता टिळक, उपमहापौर डॉ. सिद्धार्थ धेंडे, खासदार अनिल शिरोळे, सभागृह नेते श्रीनाथ भिमाले, विरोधी पक्षनेते दिलीप बराटे, शिवसेनेचे गटनेते संजय भोसले, कॉंग्रेस गटनेते अरविंद शिंदे, स्थायी समितीचे माजी अध्यक्ष मुरलीधर मोहोळ आदी यावेळी उपस्थित होते.

भाजपच्या सत्ता काळात विकासाला गती देण्यात आली आहे. तशीच गती यापुढे कायम राहील. सार्वजनिक वाहतूक, पाणी पुरवठा योजना वेळेत पूर्ण केल्या जातील. पुणेकरांच्या प्रत्येक पैशाचा शहराच्या विकासासाठी नियोजनबद्ध पद्धतीने वापर करण्यात येईल.
– सुनील कांबळे, अध्यक्ष, स्थायी समिती, मनपा.

राष्ट्रवादीची माघार
महापालिकेतील प्रमुख विरोधीपक्ष असलेल्या राष्ट्रवादी कॉंग्रेसने नगरसेविका स्मिता कोंढरे यांचा अर्ज दाखल करण्यात आला होता. त्यातच, शिवसेना आणि भाजपची युती झाल्याने शिवसेनेकडून भाजपला मतदान केले जाणार होते. तर राष्ट्रवादी आणि कॉंग्रेसकडून भाजपविरोधात मतदान केले जाण्याची शक्‍यता होती. मात्र, आयत्यावेळी राष्ट्रवादीच्या उमेदवाराने माघार घेत ही निवडणूक बिनविरोध केली. त्यामुळे एक प्रकारे राष्ट्रवादीकडून भाजपला छुपा पाठिंबाच दिल्याची चर्चा महापालिकेत असून अंदाजपत्रकात निधी मिळावा, यासाठी भाजपशी छुपी हातमिळविणी राष्ट्रवादीने केली असल्याची राजकीय चर्चा आहे.

Read more...

राजुरी येथे एमटीडीसीतर्फे कृषी पर्यटन कार्यशाळेचे ९-१० मार्च रोजी आयोजन

सजग वेब टीम, जुन्नर

जुन्नर | महाराष्ट्र पर्यटन विकास महामंडळ , पराशर कृषी पर्यटन केंद्र आणि ‘कृषी पर्यटन विश्व’ यांच्या संयुक्त विद्यमाने, दोन दिवसीय कृषी पर्यटन कार्यशाळेचे आयोजन ‘पराशर कृषी पर्यटन केंद्र’, राजूरी( आळेफाटा, नाशिक रोड, पुणे ) येथे करण्यात आले आहे. शेतीला पुरक व्यवसाय म्हणून कृषी पर्यटन मोठ्या प्रमाणात वाढत आहे. राज्यातील कृषी व ग्रामीण पर्यटन वृद्धीसाठी कृषी पर्यटन विश्व प्रयत्न करत आहे. याचाच एक भाग म्हणून या कार्यशाळेचे आयोजन केले आहे.

या दोन दिवसीय कार्यशाळेत कृषी पर्यटन संकल्पना, केंद्र उभारणी, व्यवस्थापन भविष्य आणि डिजिटल मार्केटिंग, जाहिराती, सोशल मीडिया या महत्वाच्या गोष्टीचे मार्गदर्शन करण्यात येणार आहे . या कार्यशाळेसाठी सशुल्क नोंदणी 7 मार्चच्या आधी करणे आवश्यक आहे. ही कार्यशाळा दिनांक 9 आणि 10 मार्च 2019 रोजी पराशर कृषी पर्यटन केंद्र, राजूरी, आळेफाटा, नाशिक रोड, पुणे येथे होणार आहे.

इच्छुक शेतकरी व इतर व्यावसायिक मंडळींना, कृषी पर्यटन संकल्पना समजावी. कृषी पर्यटनाची संकल्पना तसेच कृषी पर्यटन केंद्र उभारणीसाठीचे लागणारी माहिती या कार्यशाळेत देण्यात येणार आहे. नव्याने कृषी पर्यटन केंद्र सुरू करणाऱ्या लोकांना या कार्यळाचे उपयोग नक्कीच होईल. असे कृषी पर्यटन विश्वचे संचालक गणेश चप्पलवार यांनी सांगितले.

या कार्यशाळेत दीपक हरणे,(विभागीय अधिकारी, एमटीडीसी, पुणे विभाग), सचिन म्हस्के (शाखा प्रबंधक, आय डी बी आय बँक,) , शशिकांत जाधव (संचालक, आमंत्रण कृषी पर्यटन ),मनोज हाडवळे,(पराशर कृषी पर्यटन), गणेश चप्पलवार (संचालक, कृषी पर्यटन विश्व, पुणे) हे मार्गदर्शन करणार आहेत.

अधिक माहितीसाठी आणि नोंदणीसाठी 8888559886 या क्रमांकावर संपर्क साधण्याचे आवाहन करण्यात आले आहे .

——————– (Media co ordination : Prabodhan Madhyam- News Agency. Deepak Bidkar .9850583518)

Read more...

राष्ट्रवादीकडून अमोल कोल्हे यांना लोकसभेची उमेदवारी जवळपास निश्चित

सजग वेब टीम

राष्ट्रवादी काँग्रेस कडून अमोल कोल्हे यांना शिरूर लोकसभेची उमेदवारी जवळपास निश्चित

मुंबई | शिवसेनेला जय महाराष्ट्र करत प्रसिद्ध अभिनेते डॉ.अमोल कोल्हे यांनी आज अधिकृतरित्या राष्ट्रवादी काँग्रेस मध्ये प्रवेश केला. यावेळी प्रदेशाध्यक्ष आमदार जयंत पाटील, आमदार छगन भुजबळ, आमदार अजित पवार, आमदार दिलीप वळसे पाटील, विधान परिषदेचे विरोधी पक्षनेते आमदार धनंजय मुंडे, मुंबई प्रदेशाध्यक्ष सचिन अहिर, नवाब मलिक यांच्यासह पक्षातील अनेक नेते उपस्थित होते.

या पक्ष प्रवेशाच्या पार्श्वभूमीवर शिरूर लोकसभेची उमेदवारी हि डॉ. अमोल कोल्हे यांनाच देण्यात येईल अशी चर्चा राजकीय वर्तुळात होती. याच पार्श्वभूमीवर येत्या ५ मार्च पासून डॉ. अमोल कोल्हे शिरूर मतदारसंघाच्या संपर्क दौऱ्यावर जाणार असल्याची माहिती मिळत आहे. शिरूर लोकसभा मतदारसंघातील प्रत्येक विधानसभा मतदारसंघात ते सभा घेणार आहेत व या सभांसाठी प्रत्येक विधानसभा मतदारसंघातील स्थानिक नेते, कार्यकर्त्यांनी आपल्याला ठिकाणच्या होणाऱ्या सभेची जबाबदारी घेतली असल्याची माहिती मिळत आहे.

या सर्व घटना पाहता डॉ.कोल्हे यांच्या उमेदवारी संदर्भात पक्षाकडून अधिकृत घोषणा व्हायची फक्त बाकी आहे असच म्हणावे लागेल.

Read more...
Open chat