लाईफटाईम हॉस्पिटलमध्ये हृदयविकार रुग्णांवर अद्ययावत उपचार सुरु; २ दिवसात १२ शस्त्रक्रिया

 

लाईफटाईम हॉस्पिटलमध्ये हृदयविकार रुग्णांवर अद्ययावत उपचार सुरु; २ दिवसात १२ शस्त्रक्रिया

खा. नारायण राणे यांच्या हस्ते शुभारंभ; कोकणात अ‍ॅन्जिओग्राफी, अ‍ॅन्जिओप्लास्टीच्या शस्त्रक्रिया होणार

सजग वेब टीम

पडवे (विशेष प्रतिनिधी) : मल्टी सुपर स्पेशालिटी एसएसपीएम लाईफटाईम मेडिकल कॉलेज अ‍ॅण्ड हॉस्पिटलमध्ये परदेशी अद्ययावत कॅथलॅबची सुविधा असलेला सुसज्ज आणि परिपूर्ण असा कार्डिओलॉजी (हृदयरोग शस्त्र विभाग) विभाग सुरू करण्यात आला आहे. त्यामुळे आता कोकणात प्रथमच अ‍ॅन्जिओग्राफी, अ‍ॅन्जिओप्लास्टीच्या शस्त्रक्रियांची सुविधा निर्माण झाली आहे. प्रजासत्ताक दिनाचे औचित्य साधून हॉस्पिटलचे संस्थापक, माजी मुख्यमंत्री, खा. नारायण राणे यांच्या हस्ते आणि सिंधुदुर्ग शिक्षण प्रसारक मंडळाच्या अध्यक्षा सौ. निलमताई राणे, सचिव आ. नितेश राणे यांच्या प्रमुख उपस्थितीत हॉस्पिटलच्या कार्डिओलॉजी विभागाचे आणि जर्मनमधील अत्याधुनिक मशिनरींची सुविधा असलेल्या कॅथलॅबचे उद्घाटन करण्यात आले.

‘‘सिंधुदुर्ग जिल्हय़ात मल्टी सुपर स्पेशालिटी हॉस्पिटल उभारू शकलो, याचा मनस्वी आनंद वाटतो. कारण जिल्ह्यात अशा प्रकारच्या सुविधा उपलब्ध नव्हत्या. त्या सर्व प्रकारच्या वैद्यकीय सुविधा, परदेशी अत्याधुनिक मशिनरी आणि प्रत्येक विभागाचे स्पेशालिस्ट तज्ज्ञ डॉक्टर्स येथे उपलब्ध आहेत. अशा प्रकारची परिपूर्ण वैद्यकीय सेवा व उपचार मी या ठिकाणी उपलब्ध करून देऊ शकलो. याबद्दल मी समाधानी आहे. कॅथलॅबची सुविधा या रुग्णालयात निर्माण करण्यात आली. कोकणात कुठेही अ‍ॅन्जिओग्राफी, अ‍ॅन्जिओप्लास्टीच्या शस्त्रक्रिया करण्याची सुविधा नव्हती. ती या ठिकाणी उपलब्ध करण्यात आली आहे. अत्याधुनिक जर्मन मशिनरी येथे उपलब्ध करून देण्यात आलेल्या आहेत. या ठिकाणी हृदयरोगतज्ज्ञ डॉक्टर्स तसेच तंत्रज्ञ व भूलतज्ज्ञ २४ तास अहोरात्र सेवा देणार आहेत. हे हॉस्पिटल मी सर्व प्रकारचे रुग्ण ठणठणीत बरे करण्यासाठीच उभारले आहे. मात्र, काहीजण आजही अद्यापही गैरसमज पसरविण्याचे उद्योग करत आहेत. अशा मंडळींनी असे एखादे हॉस्पिटल उभारून दाखवावे. तुम्ही ते करणार नसाल, तर तुम्हाला अपप्रचार करण्याचा नैतिक अधिकार नाही,’’ असे खा. नारायण राणे यांनी विरोधकांना ठणकावले.

हॉस्पिटलचे मेडिकल सुप्रिटेंन्डट डॉ. आर. एस. कुलकर्णी प्रास्ताविक करताना म्हणाले, ‘‘हॉस्पिटलमध्ये कार्डिओलॉजी विभागाचा शुभारंभ झाला असून कॅथलॅबची सुविधाही उपलब्ध झाली आहे. कोकणात अशा प्रकारची सुविधा अन्यत्र कोठेही नाही. त्यामुळे आजचा दिवस सुवर्णाक्षरांनी लिहिण्यासारखा आहे.’’ याप्रसंगी हृदयरोग तज्ज्ञ डॉ. सूर्यकांत तायशेटे, डॉ. संजीव आकेरकर आणि डॉ. अविनाश झांटये यांनीही कॅथलॅबसह सुसज्ज कार्डिओलॉजी विभाग लाईफटाईम हॉस्पिटलमध्ये सुरू झाल्याने समाधान व्यक्त केले. या प्रसंगी मेडिकल कॉलेजचे प्राचार्य डॉ. एम. जी. हेरेकर, हृदयरोग तज्ज्ञ डॉ. एम. डी. म्हसकर, जिल्हा बँकेचे अध्यक्ष सतीश सावंत, हॉस्पिटलचे मुख्य कार्यकारी अधिकारी प्रणय अगरवाल आदी मान्यवर उपस्थित होते.

दोन दिवसांत १२ शस्त्रक्रिया

कार्डिओलॉजी विभागाचे उद्घाटन झाल्यावर दोन दिवसात ९ अ‍ॅन्जिओग्राफी आणि ३ अ‍ॅन्जिओप्लास्टी शस्त्रक्रिया करण्यात आल्या. हृदयरोग तज्ज्ञ डॉ. प्रणव शामराज, डॉ. राघवेंद्र देशपांडे, डॉ. सदानंद कुलकर्णी, डॉ. रमेश माळकर, डॉ. ज्योती कुसनूर, डॉ. संजय देसाई, तसेच तंत्रज्ञ सिद्धेश रासम आणि देवेंद्र यांच्या टीमने या शस्त्रक्रिया केल्या. अ‍ॅन्जिओग्राफीसाठी बारा ते चौदा हजार रुपये खर्च येतो. अ‍ॅन्जिओप्लास्टीच्या शस्त्रक्रियेचा खर्चही लाखाच्या घरात जातो. हे दोन्ही उपचार आता ६ हजार रुपयांमध्ये होणार आहेत. तसेच केशरी व पिवळे रेशनकार्डधारकांवर मोफत उपचार होतील.

अत्याधुनिक कार्डिओलॉजी विभाग, अ‍ॅन्जिओग्राफी, अ‍ॅन्जिओप्लास्टी शस्त्रक्रियांची सुविधा

हॉस्पिटल आणि मेडिकल कॉलेजचे वैद्यकीय अधीक्षक डॉ. आर. एस. कुलकर्णी म्हणाले, एसएसपीएम लाईफटाईम मेडिकल कॉलेज अ‍ॅण्ड हॉस्पिटल जर्मन मशिनरी असलेल्या कॅथलॅबच्या सुविधेसह स्वतंत्र परिपूर्ण असा कार्डिओलॉजी विभाग सुरू करण्यात आला असून, या विभागात दोन टीएमटी (ट्रेडमील टेस्ट) म्हणजेच धावल्यानंतर हृदयाचे ठोके मोजणा-या कार्डिओग्रामची सुविधा, तसेच दोन टू-डी इको रूम म्हणजे हृदयाची अ‍ॅक्टीव्हीटीज तपासणारे तसेच ऑक्सिजनची सुविधा असलेला विभाग, दोन इसीजी रूम, एक हॉल्टर रूम म्हणजे मशीन कमरेला बांधून ठेवल्यावर २४ तासातील हृदयाच्या हालचालींचे रेकॉर्ड तपासणीची सुविधा आहे. त्याशिवाय बीएसए म्हणजे डिजिटल अ‍ॅन्जिओग्राफीची सुविधा, रोड मॅपची सुविधा म्हणजे रक्तवाहिनीमध्ये कॅथॅटर घालण्यासाठी त्याला रस्ता दाखविणारे तंत्रज्ञान, कॅथलॅब मशीन जीई जर्मन कंपनीच्या आहेत. या मशिनद्वारे रक्त वाहिन्यांमधील ब्लॉकेजेस समजतात. हृदयाला रक्तपुरवठा करणा-या रक्तवाहिन्या तपासण्याची यंत्रणा, रक्तवाहिनीमध्ये ब्लॉक असल्यास त्यामध्ये अ‍ॅन्जिओप्लास्टी केली जाते. या मशीनमध्ये मेंदू, किडनी, यकृत यांना रक्तपुरवठा करणा-या वाहिन्यांची तपासणीची सुविधाही आहे.

Read more...
Open chat