फळभाजीपाला प्रक्रिया उद्योगाला सहकारी तत्वावर चालना देण्याची गरज – खा. अमोल कोल्हे

फळभाजीपाला प्रक्रिया उद्योगाला सहकारी तत्वावर चालना देण्याची गरज – खा. अमोल कोल्हे

सजग टाईम्स न्यूज, नारायणगाव

नारायणगाव | ”कोरोनाच्या संकटानंतर अतिवृष्टीमुळे संकटात सापडलेल्या शेतकऱ्यांना दिलासा देण्यासाठी शेतमाल साठवणूक व जलद वाहतूक या गोष्टींवर मी लक्ष केंद्रित केले आहे. जुन्नर तालुक्यात बाजार समितीच्या माध्यमातून शीतगृहे व सहकारी तत्वावर फळे भाजीपाला प्रक्रिया उद्योग पुढील पाच वर्षात सुरू करण्याची गरज आहे. शेतमालाच्या जलद वाहतूकीसाठी
पुणे-नाशिक हायस्पीड रेल्वे प्रकल्प आराखड्यात जुन्नर, आंबेगाव व खेड तालुक्यासाठी चार ठिकाणी शेतमालवाहतूक रॅकची व्यवस्था केली आहे. ज्या पद्धतीने या प्रकल्पाचे सध्या काम सुरू आहे याच गतीने आणि वेळेत निधी उपलब्ध झाल्यास पुणे नाशिक हायस्पीड रेल्वे प्रकल्पाचे काम २०२४ पर्यंत पुर्णत्वास येईल.”, अशी माहिती खासदार डॉ. अमोल कोल्हे यांनी दिली.

जुन्नर बाजार समितीच्या नारायणगाव उपबाजार केंद्राच्या भाजीपाला (तरकारी) खरेदी विक्री बाजाराचे व डिजिटल काटा पट्टीचे उदघाटन आज (ता.२५) दसऱ्याच्या शुभमहूर्तावर खासदार डॉ. अमोल कोल्हे यांच्या हस्ते झाले. या कार्यक्रमाच्या अध्यक्षस्थानी तालुक्याचे आमदार अतुल बेनके हे होते. या वेळी जुन्नर कृषी उत्पन्न बाजार समितीचे सभापती संजय काळे, विघ्नहरचे अध्यक्ष सत्यशील शेरकर, आशाताई बुचके, उपसभापती दिलीप डुंबरे, जेष्ठ संचालक धोंडिभाऊ पिंगट, निवृत्ती काळे, धनेश संचेती, संतोष तांबे, प्रकाश ताजणे, विपुल फ़ुलसुंदर, रमेश भुजबळ, गुलाबराव नेहरकर, विनायक तांबे, माऊली खंडागळे आदी मान्यवर उपस्थित होते.

खासदार डॉ. कोल्हे म्हणाले पुणे नाशिक रेल्वे प्रकल्पाचा डीपीआर सन २०१८ ला तयार झाला. मात्र या प्रकल्पाचे सादरीकरण झाले नव्हते. मी खासदार झाल्यावर उपमुख्यमंत्री अजित पवार यांना या प्रकल्पाचे सादरीकरण केले. त्या नंतर या प्रकल्पाला गती मिळाली. सद्य स्थितीत ज्या गतीने या प्रकल्पावर काम सुरू आहे ते पाहता सन २०२४ पर्यंत पुणे नाशिक रेल्वे धावेल. रेल्वे प्रकल्पाचे नियोजन करताना मी शेतकरी हिताची काळजी घेतली आहे. शेतमाल वाहतूकीसाठी जुन्नर साठी दोन, आंबेगाव व खेड तालुक्यासाठी प्रत्येकी एक रॅकची तरतूद केली आहे. वाहतूक कोंडीचा प्रश्न सोडवण्यासाठी खेड ते चांडोली दरम्यानच्या महामार्गाचे सहा पदरीकरणाचे काम लवकरच सुरु करण्यात येईल. नारायणगाव बाह्यवळण रस्ता व खेड घाटाचे काम अंतिम टप्प्यात आहे. खेड ते आळेफाटा दरम्यानच्या इतर बाह्यवळणाची कामे लवकरच सुरु होतील. जुन्नर येथील शिवसंस्कार सृष्टीचा प्राथमिक आराखडा तयार झाला आहे. या बाबत पर्यटन मंत्री आदित्य ठाकरे यांच्या समावेत बैठक झाली आहे. केंद्र व राज्य सरकारच्या माध्यमातून भव्य शिवसंस्कार सृष्टी साकारली जाईल.”

या प्रसंगी बोलताना आमदार बेनके म्हणाले केंद्र सरकारच्या शेतकरी धोरणात त्रुटी आहेत. बाजार समित्या शेतकऱ्यांच्या पैशाची हमी घेतात. या मुळे बाजार समित्या टिकणे आवश्यक आहे. सभापती काळे शेतकऱ्यांच्या हिताची काळजी घेत आहेत. उपबाजारामुळे भाजीपाल्याला योग्य भाव मिळेल. भाजीपाला वाहतूक चालक व मालक संघटनेच्या अडचणीही सोडवल्या जातील.

सभापती काळे म्हणाले सन २००४ साली बाजार समितीची वार्षिक उलाढाल ५५ कोटी रुपयांची होती. मी सभापती झाल्यानंतर उपबाजार आवाराचे अत्याधुनिकरण केले. शेतकरी, व्यापारी यांच्यासाठी सुविधा उपलब्ध केल्या. यामुळे बाजार समितीच्या वार्षिक उलाढालीत बाराशे कोटी रुपयांपर्यंत वाढ झाली आहे. पिण्याच्या पाण्यासाठी नारायणगाव येथील उपबाजारात दहा हजार लिटर क्षमता असलेली जलशुद्धीकरण प्रकल्प कार्यान्वित केला जाईल.

कोरोना काळात उत्कृष्ट कार्य बजावणारे बाजार समितीचे सचिव रूपेश कवडे,शरद घोंगडे, व्यापारी घोलप, कमलाकर वाजगे यांचा सत्कार आमदार बेनके, खासदार डॉ. कोल्हे यांच्या हस्ते करण्यात आला. कार्यक्रमाचे सूत्रसंचालन संचालक तांबे यांनी केले तर आभार उपसभापती दिलीप डुंबरे यांनी मानले.

Read more...

‘औद्योगिकनगरी’ पिंपरी-चिंचवडचा रहिवाशी असल्याचा मला अभिमान! – आ.महेश लांडगे

‘औद्योगिकनगरी’ पिंपरी-चिंचवडचा रहिवाशी असल्याचा मला अभिमान

– भाजपा शहराध्यक्ष तथा आमदार महेश लांडगे यांच्या भावना
– महापालिका वर्धापनदिनानिमित्त शहरवासियांना दिल्या शुभेच्छा

सजग वेब टीम, पुणे

पिंपरी । महाराष्ट्रातील सर्वाधिक वेगाने विकसित होणारे शहर अशी ओळख असलेल्या औद्योगिकनगरी पिंपरी-चिंचवडचा मी रहिवाशी असल्याचा मला सार्थ अभिमान आहे, अशा भावना भाजपा शहराध्यक्ष तथा आमदार महेश लांडगे यांनी व्यक्त केल्या.

पिंपरी-चिंचवड महापालिकेचा ३८ वा वर्धापन दिन (स्थापना दिवस) रविवारी साधेपणाने साजरा करण्यात आला. त्यानिमित्ताने आमदार लांडगे यांनी ‘फेसबूक लाईव्ह’द्वारे शहरवासीयांशी संवाद साधला.
आमदार लांडगे म्हणाले की, पिंपरी-चिंचवड महापालिकेच्या ३८ वर्षांच्या वाटचालीमध्ये स्व. अण्णासाहेब मगर यांच्यापासून शहराच्या विकासाला सुरूवात झाली. प्रथम महापौर ज्ञानेश्वर लांडगे यांच्यापासून विद्यमान महापौर उषा उर्फे माई ढोरे यांच्यापर्यंत अनेक महापौर, नगरसेवक, स्थायी समिती चेअरमन, विरोधी पक्षाचे नेते यांचे योगदान आहे. तसेच, आतापर्यंतचे सर्व महापालिका आयुक्त, अधिकारी, आजी- माजी पदाधिकारी, कर्मचारी यांची भूमिका महत्त्वपूर्ण ठरली आहे. विशेष म्हणजे, शहरात विविध जाती-धर्माचे लोक गुण्यागोविंदाने राहतात. कष्टकरी, चाकरमानी लोकांनी या शहराच्या विकासात भरच घातली आहे.
पिंपरी-चिंचवड महापालिकेचा वर्धापन प्रतिवर्षी उत्साहात साजरा केला जातो. मात्र, यावर्षी देशावर, राज्यावर आणि आपल्या शहरावर कोरोनाच्या संकटाचे सावट आहे. गेले सहा-सात महिने आपण सर्वजण संघर्ष करीत आहोत. किंबहून कोरोनाच्या संकटावर मात करण्यासाठी प्रत्येक नागरिक आणि प्रशासन काम करीत आहे. या लढाईत आपण अनेक जवळच्या लोकांना गमावले आहे. या संकटाच्या काळात प्रत्येक गरजवंताला मदत करण्यासाठी आपण सूजान नागरिक म्हणून पुढाकार घेतला आहे. यापुढील काळात शहराची वाटचाल अधिक झपाट्याने होईल. यात शंका नाही, असा विश्वासह आमदार लांडगे यांनी व्यक्त केला आहे.

सर्वपक्षीय नेत्यांनाही दिल्या शुभेच्छा…
पिंपरी-चिंचवडच्या विकासात आजवर सर्वपक्षीय नेत्यांनी योगदान दिले आहे. या शहरातील नागरिकांना पायाभूत सोयी-सुविधा उपलब्ध व्हाव्यात यासाठी प्रत्येत पक्षातील नेत्यांनी आपआपल्यापरीने काम केले आहे. सर्वसामान्य नागरिकाला केंद्रबिंद मानून लोकप्रतिनिधींनी विकासात योगदान दिले आहे. काही कामांना दिरंगाई निश्चित झाली. पण, विकासाच्या दृष्टीने प्रत्येकाने भूमिका ठेवली आहे.

नगरसेवक जबाबदारीने काम करताहेत…
प्रत्येक प्रभागातील नगरसेवकाने आपल्या सोयी-सुविधांबाबत महापालिका सभागृहात पाठपुरावा करावा. यासाठी नागरिकांनी आपल्याला निवडून दिले आहे. या भूमिकेतून महापालिकेतील सर्व नगरसेवक जबाबदारीने काम करीत आहेत. शहरात वाढणारी लोकसंख्या आणि त्या अनुषंगाने वाढणाऱ्या समस्या- अडचणी सोडवण्यासाठी सर्वपक्षीय नगरसेवक योगदान देत आहेत. शहरातील नागरिकांच्या सूचनांचाही विकासकामांमध्ये समावेश केला जात आहे, असा विश्वासह आमदार लांडगे यांनी पिंपरी-चिंचवडकरांना दिला.

Read more...

खा.अमोल कोल्हे यांच्या वाढदिवसानिमित्त नारायणगाव ग्रामीण रुग्णालयास मल्टीपर्पज पॅरामिटर टेस्टिंग मशीन भेट

खा.अमोल कोल्हे यांच्या वाढदिवसानिमित्त नारायणगाव ग्रामीण रुग्णालयास मल्टीपर्पज पॅरामिटर टेस्टिंग मशीन भेट

सजग टाईम्स न्यूज, नारायणगाव

नारायणगाव | शिरूर लोकसभेचे संसदरत्न खासदार डॉक्टर अमोल कोल्हे व जगदंब प्रतिष्ठान महाराष्ट्र राज्य व बंधन बॅंक यांच्यावतीने डॉ. अमोल कोल्हे यांच्या वाढदिवसाचे औचित्य साधून वाढदिवसाचा अनावश्यक खर्च टाळून नारायणगाव येथील ग्रामीण रुग्णालय कोविड केअर सेंटरला हाई फ्लो नझल ऑक्सिजन व मल्टीपर्पज पॅरामिटर टेस्टिंग मशीन ग्रामीण रुग्णालय नारायणगावचे प्रतिनिधी डॉ.योगेश आगम, डॉ. मिलिंद घोरपडे, डाॅ. अभिजीत काळे, जुन्नर तालुका डॉक्टर असोसिएशनचे डॉ.सदानंद राऊत, जगदंब प्रतिष्ठानचे प्रतिनिधी सागर रामसिंग कोल्हे, यांच्यातर्फे आज सुपूर्त करण्यात आले.

सध्या कोविड आजाराने सर्वत्र थैमान घातले असून जुन्नर तालुक्यातील नागरिकांच्या उपचारामध्ये मदत होण्यासाठी हे अत्याधुनिक मशिन अत्यंत महत्त्वपूर्ण असून सदर उपकरणामुळे ऑक्सिजनचे प्रमाण कमी असणाऱ्या रुग्णांसाठी हे उपकरण जीवनदायी ठरणार असून टेस्टिंग मशिनमध्ये २४ प्रकारच्या चाचण्या मोफत होणार असल्याची माहिती डाॅ.योगेश आगम यांनी दिली.

खा.कोल्हे यांनी वाढदिवसाच्या निमित्ताने सामाजिक बांधिलकी जपून एक संवेदनशील उपक्रम समाजोपयोगी कार्य करून आपला वाढदिवस साजरा करून एक नवा आदर्श समाजापुढे ठेवला आहे .

सदर कार्यक्रमास आशाताई बुचके, सत्यशिल शेरकर, दिलीप कोल्हे , तहसिलदार हनुमंत कोळेकर, तालुका आरोग्य अधिकारी उमेश गोडे, बंधन बॅंकेचे मॅनेजर आदित्य मराठे, तुषार डोके, अतुल आहेर, गणेश वाजगे, आशिष हांडे, संतोष केदारी, राहुल गावडे, मुकेश वाजगे, राजु कारभळ, डाॅ.सुदाम पानसरे आदी मान्यवर उपस्थित होते

Read more...

कंत्राटी कामगारांना महापालिका आस्थापनेवर कायमस्वरुपी घ्या – आ. महेश लांडगे

पिंपरी-चिंचवडमधील ‘कोरोना योद्धे’ आरोग्य कर्मचारी न्यायाच्या प्रतीक्षेत!

– आमदार महेश लांडगे यांची आयुक्त श्रावण हर्डिकर यांच्याकडे मागणी

– कंत्राटी कामगारांना महापालिका अस्थापनेवर कायमस्वरुपी घ्या!

पिंपरी (दि.२) । पिंपरी-चिंचवड महापालिका अंतर्गत सुमारे २५ लाख नागरिकांना सक्षम आरोग्य सुविधा देण्याच्या भूमिकेतून प्रशासने वैद्यकीय महाविद्यालय सुरू करण्याचा निर्णय घेतला आहे. त्यासाठी कायमस्वरुपी डॉक्टर भरती करण्यात येत आहे. मात्र, गेल्या २३ वर्षांपासून आरोग्य विभागात काम करणारे कंत्राटी कर्मचारी अद्याप न्यायाच्या प्रतीक्षेत आहेत. त्यामुळे घंटागाडी कर्मचारी, वॉर्डबॉय, रुग्णवाहिका चालक, आरोग्य सेविका यांच्यासह महापालिका रुग्णालयांमध्ये काम करणाऱ्या सर्व कंत्राटी कामगारांना महापालिका अस्थापनेवर कायमस्वरुपी रुजू करावे, अशी मागणी भाजपा शहराध्यक्ष तथा आमदार महेश लांडगे यांनी केली आहे.

महापालिकेतील सत्ताधारी भाजपाने डॉक्टर भरती प्रस्ताव आणि घंटागाडी कर्मचाऱ्यांना कायमस्वरुपी अस्थापनेवर घेण्याबाबतची उपसूचना सर्वसाधारण सभेत मंजूर केली आहे. या प्रस्तावाची अंमलबजावणी तात्काळ करावी, अशी मागणी लांडगे यांनी केली आहे.
दरम्यान, आरोग्य विभागात काम करणारे चतुर्थ श्रेणीतील कंत्राटी कर्मचारी यांना महापालिका अस्थापनेवर रजू करुन घेण्यात यावे, या मागणीसाठी माजी महापौर नितीन काळजे, राहुल जाधव यांच्या पुढाकाराने चिंचवड येथील अॅटोक्लस्टर येथे कर्मचारी प्रतिनिधी यांच्या उपस्थितीत बैठक घेण्यात आली. यावेळी भाजपचे १७ नगरसेवक, तसेच मनपा कर्मचारी आणि पदाधिकारी यांनी आयुक्त हर्डिकरांसमोर बाजू मांडली.

महापालिका आरोग्य विभागात प्रशासनाकडून वेळोवेळी निर्गत केलेल्या परिपत्रक / आदेशानुसार तात्पुरत्या स्वरुपात विविध पदे मानधनावर सहा महिने कालावधीकरिता भरण्यात येतात. सदरची प्रक्रिया २००७ पासून सुरू आहे. काही कर्मचारी यांनी महापालिकेत कायमस्वरुपी सामावून घेणे व सेवा खंडित करु नये याकरिता न्यायालयात धाव घेतली आहे. परंतु, न्यायालयाने ‘जैसे थे’ आदेश दिला आहे. परिणामी, गेल्या १३ वर्षांपासून कर्मचारी न्यायाच्या प्रतीक्षेत आहेत.
पिंपरी-चिंचवड महापालिकेची हद्दवाढ होवून नवीन १८ महसुली गावांचा महापालिकेत समावेश करण्यात आला आहे. त्यामुळे महापालिकेच्या एकूण क्षेत्रफळात व लोकसंख्येत वाढ झाल्याने आरोग्यविषयक सुविधा पुरवणे महापालिकेचे अत्यावश्यक व तातडीचे कर्तव्य आहे.

आरोग्य विभागातील कर्मचाऱ्यांना कोविड भत्ता द्या..
सध्या कोरोनाच्या परिस्थितीत आरोग्य विभागात काम करणाऱ्या कर्मचाऱ्यांना कोरोना योद्धे म्हणून सन्मान दिला जात आहे. पण, प्रशासनाची वागणूक ही कंत्राटी कर्मचारी अशीच आहे. पनवेल आणि मुंबई महापालिका प्रशासनाच्या धर्तीवर आरोग्य विभागातील कर्मचाऱ्यांना प्रतिदिन ३०० रुपये कोविड भत्ता द्यावा.
कोरोना विषाणुचा वाढता प्रसार पाहता यशवंतराव चव्हाण रुग्णालयात रुग्णांची संख्या दिवसेंदिवस वाढत आहे. त्यामुळे रुग्णालयात कर्मचाऱ्यांची आवश्यकता आहे. त्यामुळे न्यायालयात दाखल प्रकरणापैकी जे कर्मचारी वर्षांनुवर्षे कर्तव्यावर गैरहजर राहून रुग्णसेवा देत नाहीत. तसेच, कोरोनाच्या साथरोग कालावधीत रुग्णसेवा न देता गैरहजर राहिले आहेत, असे कर्मचारी सोडून ज्या कर्मचाऱ्यांनी सलग सेवा दिली आहे. तसेच प्रजनन व बाल आरोग्य कार्यक्रम (RCH), राष्ट्रीय आरोग्य अभियान (NUHM) कार्यक्रमांतर्गत कर्मचारी, राष्ट्रीय क्षयरोग दुरीकण कार्यक्रम अंतर्गत कर्मचारी (NTEP) अशा कर्मचाऱ्यांना पिंपरी-चिंचवड महापालिका अस्थापनेवर घेण्यात यावे, अशी मागणी आमदार लांडगे यांनी केली आहे.

महापालिका सफाई संवर्गात ८०० पदे रिक्त…
पिंपरी-चिंचवड महापालिका अस्थापनेवर सध्यस्थितीला सफाई संवर्गात २५९३ पदे मंजूर असून ८०० पदे रिक्त आहेत. अशा घंटागाडी कर्मचाऱ्यांना महापालिकेत समाविष्ट करुन घेण्यासाठी त्यांची शैक्षणिक आर्हतेची माहिती घ्यावी. मनपाचे सेवा नियमानुसार सफाई संवर्गातील पदासाठी चौथी पास अशी शैक्षणिक आर्हता आहे. सदरची आर्हता सध्या कार्यरत असलेल्या घंटागाडी ठेकेदार यांच्याकडे आहे किंवा कसे? याची तपासणी करुन नियुक्तीची कार्यवाही करावी. या कर्मचाऱ्यांना नियुक्त्या द्यावयाचे झालेस बिंदू नामावली तपासून नियुक्तीची कार्यवाही करावी. आज अखेर घंटागाडी ठेकेदार यांचे निधन झालेल्या त्यांच्या वारसांना महापालिका सेवेत लाड-पागे धोरण लागू करण्याबाबत कार्यवाही करावी. सध्या कार्यरत असलेले घंटागाडी ठेकेदार वयाधिक झाले असतील, तर त्यांचे बाबतीत संबंधित कर्मचारी महापालिका सेवेत घंटागाडी ठेकेदार म्हणून १९९७ मध्ये दाखल झालेल्या दिवशी वयाची अर्हताधारण करीत असल्याचा त्याचा सेवेत समावेश करण्यात यावा, अशी उपसूचना करण्यात आली आहे.

… असा आहे या प्रकरणाचा न्यायालयीन तिढा!
मे. औद्योगिक न्यायालयाने यु. एल. पी.०५/२००० मध्ये दिलेल्या मनाई आदेशाविरुद्ध महापालिकेने सदरचा विषय मे. औद्योगिक न्यायालयाच्या कार्यकक्षेत येत नाही. या मुद्याबाबत पुन्हा औद्योगिक न्यायालयात हरकत दाखल केली होती. तथापि, मे. औद्योगिक न्यायालयाने सदरची हरकत नामंजूर केली आहे. सदर निर्णयाच्या विरोधात महापालिकेने मा. उच्च न्यायालय, मुंबई येथे याचिका क्र. ४९३१/०३ दाखल केली आहे. सदरची याचिका अद्यापपर्यंत प्रलंबित आहे. त्यामुळे याप्रकरणी तोडगा काढण्यासाठी महापालिकेने उच्च न्यायालयात दाखल केलेली याचिका मागे घेणे आवश्यक आहे. तसेच, घंटागाडी ठेकेदारांनी महापालिकेविरुद्ध सर्वोच्च न्यायालय, दिल्ली येथे दाखल केलेली स्पेशिअल लिव्ह टू अपील मागे घेणे आवश्यक आहे. त्यामुळे मे. औद्योगिक न्यायालय, पणे यांच्याकडे घंटागाडी ठेकेदारांनी मनपा विरुद्ध दाखल केलेली याचिका तात्काळ निकाली काढणेबाबत विनंती करावी व त्यानिकालाप्रमाणे कार्यवाही करावी, अशी सूचना भाजपा नगरसदस्यांनी सर्वसाधारण सभेपुढे ठेवली त्याला मंजुरीही मिळाली आहे. त्यामुळे महापालिका आयुक्त श्रावण हर्डिकर यांनी सकारात्मक निर्णय घेवून अंमलबजावणी केल्यास संबंधित कामगारांना न्याय मिळणार आहे.

Read more...

खा.अमोल कोल्हे यांच्या मागणीला यश; २९५४ लाभार्थ्यांच्या खात्यावर अनुदान जमा

खा.अमोल कोल्हे यांच्या मागणीला यश; कृषी विभागाने २९५४ लाभार्थ्यांच्या खात्यावर अनुदान केले जमा

सजग वेब टीम, पुणे

पुणे | कृषी विभागाच्या विविध योजनांचे अनुदान शेतकऱ्यांच्या खात्यावर तत्काळ जमा करण्याच्या खासदार डॉ. अमोल कोल्हे यांच्या मागणीला सकारात्मक प्रतिसाद देत जिल्हा अधीक्षक कृषी अधिकारी कार्यालयाने २९५४ लाभार्थ्यांच्या खात्यावर अनुदान जमा केले.

शिरूर लोकसभा मतदारसंघातील जुन्नर, खेड, आंबेगाव, शिरुर आदी तालुक्यातील लाभार्थी शेतकऱ्यांचे विविध योजनांचे अनुदान थकले होते. सदर अनुदान वितरीत करण्याची मागणी डॉ. कोल्हे यांनी जिल्हा अधीक्षक कृषी अधिकारी यांच्याकडे पत्राद्वारे केली होती. त्यामध्ये जुन्नर तालुक्यातील ठिबक सिंचन योजनेच्या ६५० लाभार्थींचे रु. १.५ कोटी, यांत्रिकीकरण (एसटी संवर्ग) ३५० लाभार्थींचे रु. १ कोटी, आंबेगाव तालुक्यातील ठिबक सिंचन योजनेतील २५० लाभार्थींचे रु. ५० लक्ष, शिरुर व इतर तालुक्यातील ठिबक व यांत्रिकीकरण योजनेच्या १००० लाभार्थींचे रु. २ कोटी इतके मंजूर अनुदान प्रलंबित होते. कोविडच्या संकटकाळात आधीच अडचणीत आलेल्या शेतकऱ्यांची अडचण लक्षात घेऊन डॉ. कोल्हे यांनी जिल्हा अधीक्षक कृषी अधिकारी, पुणे यांना पत्र पाठवून व प्रत्यक्ष संपर्क साधून सदर अनुदान त्वरीत लाभार्थ्यांच्या बँक खात्यात जमा करण्याची मागणी केली होती. त्यानुसार २९५४ शेतकऱ्यांचे अनुदान खात्यावर जमा करण्यात आले असून उर्वरीत २६४७ प्रस्तावातील रु. ६५० लक्ष अनुदानाची मागणी कृषी उपसंचालक, फलोत्पादन – ४, कृषी आयुक्तालय यांच्याकडे केली असल्याचे जिल्हा अधीक्षक कृषी अधिकारी पुणे यांनी दिलेल्या लेखी उत्तरात स्पष्ट करण्यात आले आहे.

सातत्याने अडचणींचा सामना करणाऱ्या शेतकऱ्यांना मुळातच निसर्ग चक्रीवादळाचा मोठा फटका बसला होता. त्यातच अनुदान रखडल्याने त्यांच्या अडचणीत भर पडली होती. त्यामुळे शेतकऱ्यांच्या हिताचा विचार करून केलेल्या सातत्यपूर्ण प्रयत्नांमुळे अनुदान जमा झाल्याने शेतकऱ्यांना दिलासा मिळाला आहे, असे डॉ. कोल्हे यांनी सांगितले.

Read more...

बैलगाडा शर्यतबंदी उठविण्यासाठी नव्याने प्रतिज्ञापत्र सादर करा – पशुसंवर्धन मंत्री सुनील केदार

बैलगाडा शर्यतबंदी उठविण्यासाठी नव्याने प्रतिज्ञापत्र सादर करा: पशुसंवर्धन मंत्री सुनील केदार

सजग वेब टीम , मुंबई

मुंबई | बैलगाडा शर्यतबंदी हा मुद्दा लोकसभा निवडणुकीत प्रचंड गाजला होता. शिरूर लोकसभेची निवडणूक बैलगाडा शर्यत व वाहतूक कोंडी या प्रश्नांवरून गाजली होती. खा.अमोल कोल्हे यांनी लोकसभेत सातत्याने ही बंदी उठविण्याची मागणी केली होती.

आज झालेल्या बैठकीत पशुसंवर्धन मंत्री सुनील केदार यांनी बैलगाडा शर्यतबंदी या विषयात गांभीर्याने लक्ष घालून सर्वोच्च न्यायालयात राज्य शासनाच्या वतीने नवीन प्रतिज्ञापत्र सादर करा असे सांगितले आहे तसेच त्यासाठी खासदार व बैलगाडा संघटनेने मांडलेले मुद्दे विचारात घ्या. महाधिवक्ता आशिष कुंभकोणी यांच्याशी सुनावणी लवकर व्हावी यासाठी चर्चा करू. तसेच या संदर्भात नियमित बैठका घेऊन सुनावणी बाबतच्या स्थितीचा आढावा घेतला जाईल असेही केदार यांनी सांगितले.

सर्वोच्च न्यायालयाची वेगवेगळ्या राज्यांबाबत घेत असलेली भूमिका अन्यायकारक 

राज्य सरकारने बैलगाडा शर्यती सुरू करण्याच्या बाजूने नव्याने प्रतिज्ञापत्र सादर करावे. त्यामध्ये शर्यतबंदीमुळे खिल्लारी बैलांची जात नामशेष होण्याच्या मार्गावर असल्याची भूमिका मांडावी. त्याचबरोबर आपली सांस्कृतिक परंपरा नष्ट होत आहे, ग्रामीण अर्थकारण अडचणीत आले आहे याबाबी ठामपणे मांडल्या पाहिजेत असे सांगितले. त्याचबरोबर एकाच देशातल्या वेगवेगळ्या राज्यांबाबत सर्वोच्च न्यायालय घेत असलेली भूमिका अन्यायकारक आहे हेही ठासून मांडले पाहिजे असे मत डॉ. कोल्हे यांनी या बैठकीत व्यक्त केले.

Read more...

बिर्ला हॉस्पिटल कर्मचारी संप अखेर मागे; आमदार महेश लांडगे यांनी ‘जोडले हात’

बिर्ला हॉस्पिटल कर्मचारी संप अखेर मागे; आमदार महेश लांडगे यांनी ‘जोडले हात’

– प्रशासन- कर्मचाऱ्यांमध्ये यशस्वी समझोता

– रुग्णांना दिलासा; आरोग्य सुविधा पूर्ववत सुरू

सजग वेब टीम, पिंपरी

पिंपरी | आदित्य बिर्ला रुग्णालयातील कर्मचारी आणि प्रशासन यांच्यात सुरू असलेला वाद सोडवण्यासाठी आमदार महेश लांडगे यांनी संपकरी कर्मचाऱ्यांना अक्षरशः हात जोडले. ‘मी तुमच्यात देव पाहतो. ही वेळ आपसात भांडण्याची नाही, तर कोरोनाविरोधात लढण्याची आहे, आवाहन कर्मचाऱ्यांना केले. अखेर लांडगे यांच्या मध्यस्थीला यश मिळाले आणि कर्मचाऱ्यांनी संप मागे घेतला. त्यामुळे शहरातील आरोग्य व्यवस्थेतील महत्वाचा घटक असलेल्या रुग्णालयाची सेवा पूर्ववत सुरू झाली आहे.

पिंपरी- चिंचवडमध्ये कोरोनाची परिस्थिती दिवसेंदिवस गंभीर होत असतानाच चिंचवडमधील आदित्य बिर्ला रुग्णालयातील कर्मचाऱ्यांनी संप सुरू केला. त्यामुळे आरोग्य सुविधेवर ताण येऊ लागला. रुग्णांची हेळसांड होऊ नये. याकरिता भाजपा शहराध्यक्ष तथा आमदार महेश लांडगे यांनी पुढाकार घेतला.

दरम्यान, महापालिका आयुक्त श्रावण हर्डीकर, आरोग्य विभागाचे डॉ. पवन साळवी यांनीही सकारात्मक भूमिका घेतली. कर्मचारी प्रतिनिधी आणि रुग्णालय प्रशासन अधिकारी यांच्यात बैठक घेण्यात आली. तत्पूर्वी, आमदार लांडगे यांनी रुग्णालय आवारात संपात सहभागी झालेल्या कर्मचार्यांशी संवाद साधला.

आमदार महेश लांडगे यांच्या आवाहनास प्रतिसाद देऊन चिंचवड येथील आदित्य बिर्ला हॉस्पिटल मध्ये गेले 3 दिवस चालू असलेले हॉस्पिटल प्रशासन आणि वैद्यकीय कर्मचारी (डॉक्टरर्स, नर्स) यांच्यामध्ये असलेले आंदोलन मागे घेऊन वैद्यकीय सेवा सुरु करण्यास सुरुवात केली.

आमदार लांडगे म्हणाले की, ‘मी तुमच्यामध्ये देव पाहतो…आताची वेळ आपापसात भांडण्याची नाही, तर कोरोनाशी लढा देण्याची आहे. कर्मचाऱ्यांनी लोकांचा आणि रुग्णांचा विचार करावा.

मी कर्मचाऱ्यांच्या पाठीशी खंबीरपणे उभा…
आंदोलनात सहभागी झालेल्या सर्व कर्मचारी बांधवांच्या व्यथा मला माहीत आहेत. मी तुमच्या पाठीशी खंबीरपणे उभा आहे. पण, ही वेळ भांडण्याची नाही. तुम्ही शहरातील नागरिकांची सेवा करीत आहेत. अनेकांचे प्राण तुम्ही वाचवले आहेत. पण, आज कोरोनाशी लढण्याची वेळ असून आंदोलनाची नाही. कर्मचाऱ्यांच्या ज्या मागण्या असतील त्या प्रशासनाकडे मांडून आपणास न्याय द्यायचा मी प्रयत्न करेन, असे आश्वासन आमदार लांडगे यांनी दिले. त्याला कर्मचारी आणि प्रशासनानेही सकारात्मक प्रतिसाद दिला.

Read more...

अण्णाभाऊ साठे यांचे निवासस्थान अवघ्या महाराष्ट्राचे प्रेरणास्थान: आमदार महेश लांडगे

अण्णाभाऊ साठे यांचे निवासस्थान अवघ्या महाराष्ट्राचे प्रेरणास्थान: आमदार महेश लांडगे

– जन्मशताब्दीनिमित्त अण्णाभाऊ साठे यांचे मूळगावी वाटेगावला भेट

पिंपरी | ‘जग बदल घालुनी घाव, सांगून गेले मला भीमराव…’असा संदेश देणारे लोकशाहीर अण्णाभाऊ साठे यांचे मूळगावातील निवासस्थान हे अवघ्या महाराष्ट्रासाठी प्रेरणास्थान आहे, अशा भावना आमदार महेश लांडगे यांनी व्यक्त केल्या.

लोकशाहीर अण्णाभाऊ साठे यांच्या जन्मशताब्धी निमित्त भारतीय जनता पार्टीचे पिंपरी-चिंचवड शहराध्यक्ष तथा आमदार महेश लांडगे यांनी अण्णाभाऊ साठे यांच्या मूळगावी वाटेगाव येथे रविवारी भेट दिली. यावेळी नगरसेवक कुंदन गायकवाड यांच्यासह भाजपा पदाधिकारी-कार्यकर्ते उपस्थित होते.
सांगली जिल्ह्यातील वाळवा तालुक्यात वाटेगाव हे अण्णाभाऊ साठे यांचे गाव आहे. याठिकाणी अण्णाभाऊ साठे यांचे निवासस्थान आणि जीवनपट उलघडणारे शिल्पचित्रही आहे.

आमदार लांडगे म्हणाले की, साहित्यरत्न लोकशाहीर अण्णाभाऊ साठे यांच्या जन्मशताब्दी दिनानिमित्य त्यांच्या मूळगावी वाटेगाव या ठिकाणी जाऊन त्यांच्या पुतळ्याला हार घालून अभिवादन केले. तसेच, राहत्या घरी जाऊन अण्णाभाऊ साठे यांच्या जीवनप्रवासावर आधारित तैलचित्र व शिल्पसृष्टी पाहिल्याने आम्हांस संघर्षातून लढण्याची प्रेरणा मिळाली.

Read more...

डॉ.आंबेडकर यांच्या मूळगावातील शाळेला पिंपरी-चिंचवड भाजपाची मदत

डॉ. आंबेडकर यांच्या मूळगावातील शाळेला पिंपरी-चिंचवड भाजपाची मदत

– विरोधी पक्षनेते देवेंद्र फडणवीस यांच्या वाढदिनानिमित्त सामाजिक उपक्रम

– भाजपा शहराध्यक्ष तथा भोसरीचे आमदार महेश लांडगे यांचा पुढाकार

– आंबडवेतील सावित्रीबाई फुले शिक्षण प्रसारक मंडळाला ‘एक हात मदतीचा’

पिंपरी । शिका, संघटीत व्हा आणि संघर्ष करा, असा संदेश जगाला देणारे भारतरत्न डॉ. बाबासाहेब आंबेडकर यांच्या मूळगावी म्हणजे आंबडवे या ठिकाणी असलेली शाळा निसर्ग चक्रीवादळाच्या तडाख्यात जमीनदोस्त झाली. दापोलीतील ग्रामीण भागात असलेल्या या शाळेची डागडूजी करण्यासाठी आता भाजपा आमदार तथा शहराध्यक्ष महेश लांडगे यांच्या साथीने पिंपरी-चिंचवड भाजपा कार्यकर्त्यांनी पुढाकार घेतला आहे.
राज्याचे विरोधी पक्षनेते देवेंद्र फडणवीस यांच्या वाढदिवसानिमित्त ‘एक हात मदती’चा उपक्रमांतर्गत आमदार महेश लांडगे यांनी ‘निसर्ग’ चक्रीवादाळत नुकसान झालेल्या कोकणातील विविध गावांमध्ये मतदकार्य करण्याचा निर्धार केला आहे. बुधवारी सकाळी ही मदत शाळेला पोहोच झाली. यावेळी संस्थेचे अध्यक्ष माजी खासदार अमर साबळे, आमदार महेश लांडगे, नगरसेवक कुंदन गायकवाड, विकास डोळस सामाजिक कार्यकर्ते डॉ. संतोष बारणे आदी उपस्थित होते.
यापूर्वी पिंपरी-चिंचवडकरांनी सांगली आणि कोल्हापूर जिल्ह्यात पूरग्रस्त नागरिकांसाठी लक्षवेधी मदतकार्य केले होते.

रत्नागिरी जिल्ह्यात दापोली तालुक्यातील जालगाव या ठिकाणी सावित्रीबाई फुले शिक्षण प्रसारक मंडळ नावाची संस्था आहे. या संस्थेच्या माध्यमातून मंडणगड येथील लोकनेते गोपीनाथजी मुंडे कला वाणिज्य व विज्ञान महाविद्यालय आहे. याठिकाणी सांस्कृतिक भवन, जिमखाना, महिला वसतिगृह आहे. मंडणगडपासून सुमारे १७ किमी अंतरावर भारतरत्न डॉ. बाबासाहेब आंबेडकर यांचे मूळगाव आंबडवे आहे.

आंबडवे येथील भारतरत्न डॉ. बाबासाहेब आंबेडकर विद्यामंदिर व असोंड येथील आश्रमशाळा व वसतिगृह चालवले जाते. अत्यंत ग्रामीण भागात संस्थेचे कार्य सुरू आहे. भटक्या विमुक्त समाजातील मुलांना, आर्थिकदृष्ट्या मागास वर्गातील मुलांना शिक्षणाची दारे खुली व्हावीत. या हेतुने संस्था कार्यरत आहे. गेल्या २६ वर्षांपासून संस्थेच्या ज्ञानार्जनाचे कार्य अखंडपणे सुरू आहे.
निसर्ग चक्रीवादळामुळे संस्थेचे मोठे नुकसान…
आंबडवे येथील आपल्या शाळेच्या इमारतीवरील व सांस्कृतिक भवनावरील एकही पत्रा व शेड शिल्लक राहिलेली नाही . तशीच परिस्थिती मंडणगड कॉलेज व बाकी शाळांची झालेली आहे . कॉलेज इमारतीवरील तसेच लेडीज हॉस्टेल व सांस्कृतिक भवनावरील सुमारे 1100 पत्र्यांचे नुकसान झाले आहे . किमान 50 ते 60 लाखांचे नुकसान आपल्या सर्व प्रकल्पाचे झाले आहे. गेल्या महिनाभरात पत्रे बसवण्याचे काम प्रगतीपथावर आहे. सांस्कृतिक भवन आणि महिला वसतिगृहाचे काम मदतीच्या प्रतीक्षेत आहे. मंडणगडच्या युनिटचे मोठे नुकसान झाले. संस्थेच्या सर्वच पाच युनिटमधील वीज पुरवठा व्यवस्था कोलमडली आहे अशी माहिती संस्थेचे कार्याध्यक्ष श्रीराम इदाते यांनी दिली.

राज्य शासन पुरस्कारप्राप्त शाळा पण संकटात मदत शून्य…

कर्मवीर दादासाहेब इदाते यांच्या प्रेरणेने सुरू झालेल्या आपल्या संस्थेने गेली 26 वर्ष शिक्षण क्षेत्रात अतुलनीय कार्य केले आहे. भाजपाचे माजी राज्यसभा सदस्य अमर साबळे संस्थेचे विद्यमान अध्यक्ष आहेत. कर्मवीर दादांनी सुरू केलेल्या या सर्व संस्था अतिशय दुर्गम भागात कार्यरत आहेत. त्यामुळे साहजिकच आर्थिक विषयामध्ये संस्थेने कधीही पैसा कमविण्याचा अथवा शिक्षणाचा धंदा करण्याचा प्रयत्न केला नाही. संस्था 80 G मान्यताप्राप्त असून आपल्या संस्थेला महाराष्ट्र शासनाचा मनाचा शाहू- फुले-आंबेडकर हा पुरस्कार देखील प्राप्त झाला आहे. परंतु, निसर्ग चक्रीवादळ होवून एक महिना झाला. पण, राज्य सरकार अथवा जिल्हा प्रशासनाकडून कसलीही मदत संस्थेला मिळालेली नाही, अशी खंतही कार्याध्यक्ष इदाते यांनी व्यक्त केली.

स्व. गोपिनाथ मुंडे यांच्या प्रयत्नांमुळे साकारले होते सिनिअर कॉलेज…
सावित्रीबाई फुले शिक्षण प्रसारक मंडळाच्या सर्व संस्था ग्रामीण भागात आहेत. डॉ. बाबासाहेब आंबेडकर यांनी जगला शिक्षणाचा संदेश दिला. पण, त्यांच्या जन्मगावी चौथीपर्यंतसुद्धा शाळा नव्हती. ज्या भागात शिक्षणाचा लवलेश नव्हता. अशा भागातील मुलांसाठी संस्थेने शाळा सुरू केल्या आहेत. युती सरकारच्या काळात तत्कालीन मंत्री स्व. गोपिनाथ मुंडे यांच्या प्रयत्नांमुळेच मंडणगड येथे सिनिअर कॉलेज सुरू झाले. कारण, मंडणगड तालुका असला तरी, एखाद्या शासकीय कर्मचाऱ्याला शिक्षा करावयाची असेल, तर त्याची बदली आजही मंडणगड येथे केली जाते. असोंड येथे भटके विमुक्तांसाठी आश्रमशाळा आणि ओबीसी मुलांसाठी वसतिगृह आहे. सातवीनंतर पुढे काय? म्हणून संस्थेच्या पुढाकाराने माध्यमिक वसतिगृह विनाअनुदानित तत्त्वावर सुरू केले आहे. या संस्थेच्या माध्यमातून सुमारे १ हजार २०० मुलांना शिक्षण दिले जाते. सध्या कोरोनामुळे शाळा, वसतिगृह, आश्रमशाळा बंद आहेत. पण, शाळा सुरू होण्यापूर्वी सर्व डागडूजी करण्याची चिंता संस्था चालकांना आहे.

माजी समाज कल्याण मंत्री भाई गिरकर यांचा दानशूरपणा…
सावित्रीबाई फुले शिक्षण प्रसारक मंडळाला माजी समाज कल्याण मंत्री विजय तथा भाई गिरकर यांनी कायम मदत केली आहे. निसर्ग चक्रीवादळानंतर गिरकर यांनी चौथ्या दिवशी शाळेला भेट दिली. त्यावेळी झालेल्या नुकसानीची पाहणी करुन गिरकर यांनी संस्थेला १ लाख रुपयांचा धनादेश मदत म्हणून दिला होता. तसेच, गिरकर यांच्या मार्गदर्शनाखाली सुरू असलेल्या समता परिषदेकडूनही १ लाख रुपयांचा धनादेश संस्थेला देण्यात आला आहे. संस्थेच्या वाटचालीत भाई गिरकर यांचे मोठे योगदान आहे, असेही कार्याध्यक्ष इदाते यांनी म्हटले आहे.

Read more...

पुणे- पिंपरी-चिंचवड ‘लॉकडाऊन’मध्ये औद्योगिक कंपन्या सुरू ठेवण्याची परवानगी द्या – आमदार महेश लांडगे

पुणे- पिंपरी-चिंचवड ‘लॉकडाऊन’मध्ये औद्योगिक कंपन्या सुरू ठेवण्याची परवानगी द्या : आमदार महेश लांडगे

– पुणे विभागीय आयुक्त दीपक म्हैसेकर, महापालिका आयुक्तांना यांना निवेदन

– ‘लॉकडाऊन’च्या नियमावलीत उद्योगांबाबत स्पष्ट निर्देश देण्याची मागणी

सजग वेब टीम, पुणे

पिंपरी (दि.११) । कोरोना रुग्णांची वाढती संख्या नियंत्रणात आणण्यासाठी आणि साखळी तोडण्यासाठी ‘लॉकडाऊन’ करणे उचित आहे. पण, गेल्या तीन महिन्यांपासून बंद असलेले औद्योगिक क्षेत्राचे अर्थ‘चक्र’ पुन्हा लॉकडाउन करुन बंद ठेवणे चिंताजनक आहे. या संकटामुळे उद्योग आणि कामगार समस्येच्या गर्तेत अडकणार आहेत. त्यामुळे लॉकडाऊनमध्ये कंपन्या सुरू ठेवण्यासाठी परवानगी द्यावी, अशी मागणी विभागीय आयुक्त दीपक म्हैसेकर यांच्याकडे भाजपाचे पिंपरी-चिंचवड शहराध्यक्ष तथा आमदार महेश लांडगे यांनी केली आहे.

पुणे आणि पिंपरी-चिंचवडमधील कोरोना रुग्णांची वाढती संख्या लक्षात घेवून पुणे विभागीय आयुक्त दीपक म्हैसेकर यांनी शुक्रवारी १३ जुलैपासून १० दिवस कडकडीत लॉकडाऊनची घोषणा केली आहे.
यावर विभागीय आयुक्त डॉ. दीपक म्हैसेकर, महापालिका आयुक्त श्रावण हर्डिकर यांनी लॉकडाउनमध्ये उद्योग सुरू ठेवण्याबाबत मराठा चेंबर ऑफ कॉमर्स आणि पिंपरी-चिंचवड लघू उद्योजक संघटनांच्या प्रतिनिधींशी व्हीडिओ कॉन्फरन्स आयोजित करावी, अशी मागणी आमदार लांडगे यांनी केली आहे.

कोरोना विषाणुच्या पार्श्वभूमीवर देशभरात मार्चअखेरीस लॉकडाउन सुरू करण्यात आला. त्यामुळे संपूर्ण औद्योगिक क्षेत्र ठप्प झाले. त्यावर अवलंबून असलेल्या लाखो कर्मचाऱ्यांसह उद्योगांचे आर्थिक बजेट कोलमडले. तीन महिने उद्योग बंद होते. पुणे, पिंपरी-चिंचवडमधील आयटी आणि अन्य तत्सम कंपन्यांमधील कर्मचाऱ्यांनी तणावातून आत्महत्या केल्याच्या घटना समोर आहेत. यापुढे हे चित्र आणखी भयावह होणार आहे.

कामगार, उद्योजक अडचणीत सापडणार…

केंद्र सरकारने ‘आत्मनिर्भर भारत’ योजनेंतर्गत उद्योगांचे चाक पुन्हा सुरू करण्यासाठी मोठी तरतूद केली. त्याचा फायदा पुणे जिल्ह्यातील तसेच पिंपरी-चिंचवड शहरातील उद्योगांना निश्चितपणे झाला. जुलैच्या सुरवातीला उद्योग क्षेत्राचे काम काहीप्रमाणात पूर्ववत होत आहे. मायगावी परतलेले कामगार पुन्हा कंपन्यांमध्ये दाखल होवू लागले आहे. उद्योगाचे चाक काहीअंशी सुरळीत होईल, अशी अशा असतानाच पुन्हा लॉकडाउन करुन १० दिवस ‘सक्तीचा बंद’ ठेवावा लागेल. परिणामी, लाखो कामगार आणि उद्योजक अडचणीत सापडणार आहेत. यासाठीच उद्योगांना लॉकडाउनमधून वगळावे, अशी मागणी आमदार लांडगे यांनी केली आहे.

नियमांचे पालन करुन उद्योग सुरू ठेवण्यास हरकत काय?

वास्तविक, पुणे आणि पिंपरी-चिंचवडची ओळख औद्योगिक शहरे अशीच आहे. या शहरांमध्ये कोरोनाचा प्रादुर्भाव वाढत आहे. ही साखळी तोडण्यासाठी लॉकडाउन योग्य आहे. पण, हा लॉकडाउन करीत असताना उद्योग आणि कामगारांचा विचार होणे अपेक्षित होते. सामाईक अंतर (फिजिकल डिस्टंन्सींग) आणि सॅनिटाईझर, मास्क यासह शक्य त्या सर्व प्रकारची काळजी घेवून कंपन्यांनी आपले काम सुरू केले आहे. कामगारही अत्यंत गांभीयपूर्वक प्रशासनाच्या सूचनांचे पालन करीत आहेत. मग, लॉकडाउन केला तरी, नियमांचे पालन करुन उद्योग सुरू ठेवण्यास अडचण काय? असा प्रश्न उपस्थित होतो.

आत्मनिर्भर ‘पॅकेज’ने तारले पण…

कोरोना लॉकडाउन काळात संकटात आलेल्या औद्योगिक क्षेत्राला चालना देण्यासाठी केंद्र सरकारने आत्मनिर्भर योजना आणली. त्याअंतर्गत उद्योजकांना कर्ज योजनेतून २० टक्के कर्ज हे ८ टक्के व्याजदाराने उपलब्ध करुन दिले. सुरवातीचे दोन वर्षे त्याचे केवळ व्याज भरण्याची मूभा आहे. हप्ते भरण्यातून सूट दिली आहे. आद्योगिक क्षेत्राची विस्कटलेली घडी सुरळीत करण्यासाठी ही योजना मदतीची आहे. पण, आता पुन्हा लॉकडाउनमुळे उद्योजक अडचणीत येणार आहे. व्यावसायिक स्पर्धा, सर्व कर भरणे, वीजबील आणि कामगारांचे पगार यासारख्या अनेक समस्यांनी यामुळे उद्योजक त्रस्त होणार आहे. परिणामी, औद्योगिक क्षेत्र पुन्हा एकदा समस्येच्या गर्तेत सापडणार आहे. त्यामुळे प्रशासनाने लॉकडाउनमध्ये उद्योगांना वगळने हितावह ठरणार आहे.

कामगारांचे ‘बजेट’ पुन्हा कोलमडणार…

सध्या तीन महिन्यांपासून अनेक कंपन्यांचे उत्पादन बंद होते. उद्योगांची आर्थिक घडी विस्कळीत झाली होती. त्याचा परिणाम अगोदरच कामगारांच्या पगारावर होत आहे. अनेक कंपन्यांमध्ये कामगार कपातीचे धोरण अवलंबले आहे. कोरोना आणि लॉकडाउनमुळे अगोदरच कामगारांचे ‘बजेट’ कोलमोडले होते. जुलैच्या सुरवातीस कंपन्या सुरू झाल्या त्यामुळे कामगारांना आशेचा किरण होता. दैनंदिन घरखर्च, घराचे हप्ते, मुलांच्या शाळांच्या फीसाठी शाळांचा सुरू असलेला तगादा, घरभाड्यासाठी वेठीस धरणारे मालक…अशा अनेक अडचणींचा सामना सध्या कामगार करीत आहेत. पण, कंपनी सुरू राहिली, तर काहीसा दिलासा मिळेल, या आशेने कामगार नव्याने सुरूवात करीत आहेत. पण, पुन्हा लॉकडाउन झाल्यामुळे कामगारांवर बेकारीचे कुऱ्हाड कोसळणार आहे. कारण, मागील लॉकडाऊनचा अनुभव पाहता लॉकडाउन .1, .2, .3 अशी आवश्यकतेनुसार वाढ केली होती. आता नव्याने १० दिवस केलेले लॉकडाउन पुन्हा वाढवण्याची भीती नाकारता येत नाही. त्यामुळे प्रशासनाने कामगार आणि उद्योग यांचा सर्वसमावेशक विचार करुन लॉकडाऊनबाबत भूमिका स्पष्ट करणे अपेक्षित आहे.

Read more...
Open chat