कोरोना संदर्भात प्रशासन सतर्क; तालुक्यातील परिस्थितीवर आमचे बारीक लक्ष – आ. अतुल बेनके

कोरोना संदर्भात प्रशासन सतर्क; तालुक्यातील परिस्थितीवर आमचे बारीक लक्ष – आ. अतुल बेनके

खासगी हॉस्पिटलच्या डॉक्टरांची उद्या बैठक

जुन्नर | पुणे जिल्हा परिषदेचे मुख्य कार्यकारी अधिकारी आयुष प्रसाद यांनी आज व्हिडीओ कॉन्फिरन्सिंगद्वारे जिल्ह्यातील कोरोना विषाणू संदर्भातील परिस्थिती चा आढावा घेतला. या कॉन्फिरन्सिंग मध्ये जिल्ह्यातील २१ आमदारांपैकी जुन्नर चे आमदार अतुल बेनके हे एकमेव आमदार सहभागी होते. या दरम्यान बेनके यांनी प्रसाद यांच्याशी कोरोना संदर्भात विविध विषयांवर चर्चा केली. तसेच जुन्नर तालुक्यातील प्रशासकीय तयारी तसेच कामकाजाचा आढावा या संदर्भात चर्चा केली. तालुक्यातील प्रशासनाचा आढावा घेतल्यानंतर प्रसाद यांनी ‘जुन्नर पॅटर्न’ चे कौतुक करत संपूर्ण जिल्हाभर याचा अवलंब करण्याच्या सूचना याप्रसंगी इतर अधिकाऱ्यांना दिल्या.

कोरोना विषाणू च्या पार्श्वभूमीवर तालुक्यातील विविध विभागांच्या प्रमुख अधिकाऱ्यांशी मी सतत संपर्क साधत आहे तसेच परिस्थितीवर आम्ही बारीक लक्ष ठेवून आहोत. उद्या सकाळी १० वा. तालुक्यातील खासगी हॉस्पिटलच्या डॉक्टरांची बैठक बोलावली आहे असे जुन्नर चे आमदार अतुल बेनके यांनी सजग टाईम्स शी बोलताना सांगितले.

कोरोना विषाणू संदर्भात आज तालुक्यातील विविध प्रशासकीय विभागांच्या प्रमुख अधिकाऱ्यांच्या बैठकीत आज आमदार बेनके उपस्थित होते.

जुन्नर तालुक्यात पुणे, मुंबई इतर शहरे तसेच विदेशातून येणाऱ्या लोकांची माहिती घेण्याचं काम आशा वर्कर्स गेल्या काही दिवसांपासून करत आहेत. या माहितीनुसार आरोग्य विभागास लोकांचे विलगीकरण करणे सोपे जाते.

संपुर्ण जुन्नर तालुक्यात बाहेरच्या ठिकाणांहून आलेल्या लोकांची संख्या हि तब्बल १२००० इतकी आहे. यातील लहान घर असणाऱ्या लोकांसाठी ओझर, लेण्याद्री याठिकाणी राहण्याची आणि खाण्याची व्यवस्था स्वतंत्र कक्ष स्थापन करून करण्यात आली आहे. या संदर्भात प्रशासन आणि इतर विभाग मदत करत आहेत. या सर्व गोष्टींचा आढावा मी वेळोवेळी घेत आहे. मी तालुक्यातील यंत्रणेशी सतत संपर्कात आहे. या कामात कुठलाही हलगर्जीपणा आणि कामचुकारपणा होणार नाही याची दक्षता प्रशासन पातळीवर घेण्यात यावी अशा कडक सूचना यानिमित्ताने संबंधित विभागास देण्यात आल्या आहेत. तालुक्यातील सर्व परिस्थिती हाताळण्यास प्रशासन यंत्रणा सज्ज आहे आणि चांगल्या पद्धतीने काम करत आहे अशी माहिती यावेळी आमदार बेनके यांनी दिली.

आजच्या या बैठकीत आमदार बेनके, तहसीलदार कोळेकर, तालुका विकास अधिकारी विकास दांगट, आरोग्य विभागाचे अधिकारी तसेच इतर विभागांचे प्रमुख अधिकारी उपस्थित होते.